ئیدارەی گەرمیان بۆ روبەڕوبوونەوەی كۆرۆنا لەگەڵ ناوەندە ئەكادیمیەكان كۆبوویەوە
گەرمیان
ئیدارەی گەرمیان لەگەڵ ناوەندە ئەكادیمیەكانی سنورەكەی كۆبوویەوە و چەند بڕیارێكی تایبەت بە هەڵمەتی هۆشیاری روبەڕوبوونەوەی كۆرۆنا دەركران.
ژووری ئۆپەراسیۆنی ئیدارەی گەرمیان بۆبەرەنگاربوونەوەی كۆرۆنا كۆبووەوە، بەرپرسانی ئەكادیمی ئیدارەكەش تیایدا بەشداریان كرد و سەرپەرشتیاری ئیدارەی گەرمیان ئاشكرایكرد، دەستیانكردووە بە ئەنجامدانی زنجیرەیەك كۆبوونەوە لەگەڵ ئەو چین و توێژانەی لەكۆمەڵگەدا بەرچاوو دیارن، سەرنج و پێشنیاری باشیان لێوەرگرتوون.
سەرۆكی ژووری ئۆپراسیۆنەكان ئاماژەی بەوە كرد ئامانجی كۆبونەوەكەیان بۆ وەرگرتنی پێشنیار و سەرنجی ناوەندە ئەكادیمیەكانی ئیدارەكەیە بۆ ئەوەی هەموولایەك پێكەوە بەئاراستەی ڕوبەڕوبوونەوەی كۆرۆنا هەنگاوی دروست بنین.
لەم كۆبونەوەیەدا پسپۆرانی بواری تاقیگەیی لەزانكۆی گەرمیان و پەیمانگای تەكنیكی كەلار لەڕوی زانستییەوە بارودۆخی ئێستای ناوچەكەیان لێكدایەوە و پێشنیاری خۆیان دایە ئیدارەی گەرمیان و هەموولایەك هاوڕابوون لەسەر بەئەنجام گەیاندنی هەڵمەتێكی گەورەی هۆشیاری و دروستكردنی ئیرادەی خۆپارێزی لای تاك.
بەگوێرەی ئەنجامی كۆبوونەوەكە لەئەمڕۆوە سەرۆكایەتی زانكۆی گەرمیان دەست دەكات بەئەنجامدانی هەڵمەتێكی هۆشیاری لەسۆشیال میدیا و تۆڕەكۆمەڵایەتییەكاندا.
لەو كۆبونەوەیەدا بڕیاردرا بەهەماهەنگی لەگەڵ پەیمانگای تەكنیكی كەلار (مۆبایل تیم)ی پەیمانگاكە لەلایەن ئیدارەی گەرمیانەوە پاڵپشتی دەكرێت بۆ ئەوەی لەبەدەنگەوەچوون و خزمەتكردن بەوكەسانە بەردەوامبن كەھەڵگر و تووشبوی ڤایرۆسەكەن و لەماڵەوە چارەسەر وەردەگرن.
|