"هەموو بەڵگەکان گەواهیدەرن هاوسەرى سێوان تاوانبارە"

ئەمڕۆ سەرۆکی لیژنەی لێکۆڵینەوە لە وەزارەتی ناوخۆ رایگەیاند، هەموو بەڵگەکان گەواهی دەرن بۆ تاوانبارکردنی تۆمەتبارى کەیسى سێوان قادر و منداڵەکانى.

سەرکەوت عومەر سەرۆکی لیژنەی لێکۆڵینەوە لە وەزارەتی ناوخۆ لە راگەیەنراوێکدا ئاماژەی بەوەکردووە، لەگەڵ دەست بەکاربونیان لە وەرگرتنی دۆسیەکە و بە هەماهەنگی لەگەڵ بەڕێوەبەرایەتی پۆلیس چەمچەماڵ دا ،هەموو ڕێکارێکی لێکۆڵینەوەیان لە بارەى کەیسى سێوان قادر و منداڵەکانى  ئەنجام دا بەمەبەستی گەیشتن بە ڕاستی ڕوداوەکە، لێکۆڵینەوە لە ڕوداوێکی لەم جۆرەنەخشە بۆ کێشراو هێندە ئاسان نیەو ماندووبونی زۆری ویست.

ئەمە لەکاتیکدایە  لە شەوی 16ی کانونی یەکەمی 2018، لە روداوێكی ئاگركەوتنەوەدا لە چەمچەماڵ سێ منداڵ گیانیان لەدەستدا، دوای هەفتەیەك مانەوەش لە نەخۆشخانە، دایكی ئەو منداڵانە بە ناوی سێوان قادر بەهۆی سەختی سوتانەكەیەوە لە نەخۆشخانەی ئیمێرجینسی سلێمانی گیانی لەدەستدا.

 دەقی راگەیەنراوەکەى لێژنەی لێکۆڵینەوەی وەزارەتی ناوخۆ  

(کەیسی سێوان قادر)

ماوەیەکی زۆرە زۆربەی دەزگا میدیایی و ڕاگەیاندنەکان پەیوەندیمان پێوە دەکەن سەبارەت بە چارەنوسی کەیسی خوالێخۆشبوان سێوان قادروو مناڵەکانی بەسیفەتی ئەوەی ئێمە سەرۆکی لێژنەی لێکۆڵینەوە بوین لەم دۆسیەیەدا،بە پێویستی دەزانم دواین قسەو سەرنجی خۆمان پێش دوا بریاری یەکلاکرەوەی دۆسیەکە لە دادگا بخەینە ڕوو .

1/لەگەڵ دەست بەکاربونمان لە وەرگرتنی دۆسیەکە و بە هەماهەنگی لەگەڵ بەڕێوەبەرایەتی پۆلیس چەمچەماڵ دا ،هەموو ڕێکارێکی لێکۆڵینەوەمان ئەنجام دا بەمەبەستی گەیشتن بە ڕاستی ڕوداوەکە،،لێکۆڵینەوە لە ڕوداوێکی لەم جۆرەنەخشە بۆ کێشراو هێندە ئاسان نیەو ماندووبونی زۆری ویست .

2/ دوبارە ئەنجام دانەوەی هێڵکاری شوێنی ڕووداو گەران بەدوای فاکتەکانداو سەرلەنوێ ئەنجامدانی کاری تیمی بەڵگەو تاوان لە هۆکاری سەرهەڵدانی ئاگرەکە مشت و مڕێکی زۆری نایەوە .

3/پاش گۆاستنەوەی دۆسیەکە لە چەمچەماڵ وڕەوانەکردنی بۆ سلێمانی بە هەماهەنگی لەگەل تیمی دادوەری و پۆلیس ئەزمەڕ کارەکان بەرەو پێش چونی باشی بەخۆیەوە بینی ،تا گەیشتە کۆتایی ماوەیەکی زۆر تێپەڕی بەسەریدا بەهۆی ڕەوشی ئەوکات و بایکۆتی دەوامی فەرمانگەکان وچەند جارێک ڕەوانە کردنی پەڕاوەکه بۆ دادگای تەمیز لە هەولێر و سلێمانی .

4/ئێمە وەک تیمی وەزارەتی ناوخۆ هەر لەلیژنەی تایبەتمەند لەلایەن بەڕێز جەنابی وەزیرو بەڕێز بەڕێوەبەری گشتیمان ڕاسپێردراین کەدەبێت شەوو ڕۆژ بخەینە سەر یەک بەمەبەستی گەیشتن بە حەقیقەتی ڕووداوەکەو دیاری کردنی تاوابارو ئەنجامدەری تاوانەکە،ئەمە جگە لەوەی بەڕێوەبەرایەتی پۆلیسی سلێمانی و کەرتی پۆلیسی ئەزمەڕوو دادوەری تایبەت مەند زۆر ماندوونەناسانەکاریان کرد تا ساتی ڕەوانە کردنی دۆسیەکە بۆ دادگای تاوانەکان وتەواو کردنی لێکۆڵینەوە .

ئێمە بە پێویستی دەزانین لێرەوە بەڕای گشتی ڕابگەیەنین کە هەموو بەڵگەکان گەواهی دەرن بۆ تاوانبارکردنی تۆمەتباروو دڵنیاشین لە دڵسۆزی و ویژدانی بەرزی دادوەرە بەڕێزەکانی دادگای تاوانەکان

زۆر لەوە دڵنیاین کە شەونخونی و ماندوبونی تیمی لێکۆڵینەوە بە زیدە ناڕوات و ئەنجامیش دادگای تاوانەکانیش لەبەردەم خواو عەدالەت جێگەی ئەوو ووتە؟پیرۆزەدا دەبن کە دەفەرموی (وآذا حكمتم بین الناس ان تحكم بالعدل ).

سەرۆکی لیژنەی لێکۆڵینەوە لە وەزارەتی ناوخۆ

عەمید /سەرکەوت عومەر