زانایانی ئایینی كەركوك داوای كردنەوەی مزگەوتەكان دەكەن
زانایانی ئایینی شاری کەرکوک داوای کردنەوەی مزگەوتەکانیان کرد
فۆتۆ:
ژمارەیەك لە زانایانی ئایینی ئیسلام لە شاری كەركوك لەسەرجەم نەتەوە جیاجیاكانی شارەكە، داوای كردنەوەی مزكەوتەكانیان كرد .
لە كۆنگرەیەكی ڕۆژنامەوانیدا زانایانی ئایینی كەركوك ڕایانگەیاند، گلەییان هەیە لە شانەی قەیرانەكان و ئیدارەی شارەكە كە بە هیچ شێوەیەك وەڵامی داواكارییەكانیان نادەنەوە سەبارەت بە كردنەوەی مزگەوتەكان .
داواشیان لە لیژنەی باڵای ئۆپراسیۆنەكان و وەقفی سونی شارەكە كرد، ڕێگە بدە بە كردنەوەی مزگەوتەكان، بە تایبەت كە چەندین شوێنی دیكەی شاری كەركوك وەك مۆڵ و بازارەكان بە تەواوی كراونەتەوە و دۆخەكە بەرەو ئاسایی بوونەوە دەچێت .
ئەو زانا ئاینیانە گلەیی ئەوەشیانكرد، كە هیچ نوێنەرێكیان نییە لە شانەی قەیرانەكانی كەركوك و بۆ هیچ پرسێكی تایبەت بە مزگەوتەكان پرسیان پێناكرێت و ئاگادار نین .
ئاماژەیان بەوەشكرد، زانایانی ئایینی ڕۆڵی كاریگەرییان هەبووە سەبارەت دەركردنی فتوای ڕاگرتنی نوێژی جومعەو بەكۆمەڵ لە مزگەوتەكان و داخستنیان و پێدانی ڕێنمایی بە هاوڵاتیان كە پابەندی رٍێكارە تەندروستییەكان بن .
داواشیان لەو كەسانە كرد كە لە كۆرۆنا چاكبوونەتەوە، وەك ئەركێكی ئایینی و مرۆیی بچن بۆ نەخۆشخانەكان بۆ بەخشینی پلازمای خوێنن لە پێناو ڕزگاركردنی گیانی نەخۆشێك كە پاداشتێكی زۆری هەیە لای خوای گەورە .
داواشیان كرد بە ڕەچاوكردنی ڕێنماییە تەندروستییەكان ڕێگە بدرێت بە كردنەوەی مزگەوتەكان و لەماوەی رابردووشدا هۆكاری ئەوەی كە مزگەوتەكانیان نەكردووەتەوە، لەبەر ڕەچاوكردنی ڕێنماییە تەندروستییەكان و بە تەنگەوە هاتنی تەندروستی خەڵك بووە .
|