پۆلیسی سلێمانی: ئەو شۆفێرەی بەئۆتۆمبێلەکەی لەژنێکی دا و هەڵهات دەستگیرکرا
لە سلێمانی ئەو شۆفێرەی بەئۆتۆمبێلەکەی لەژنێکی دا و هەڵهات دەستگیرکرا
فۆتۆ: ئەرشیڤ
سلێمانی
لە سلێمانی ئۆتۆمبێلێک لەژنێکی دا و دوای گەیاندنی بەنەخۆشخانە گیانی لەدەستدا، دوای ڕوداوەکە شۆفێری ئۆتۆمبێلەکە هەڵهات بەڵام دواتر لەلایەن هێزەکانی پۆلیسەوە دەستگیرکراوە .
بەڕێوەبەرایەتی پۆلیسی پارێزگای سلێمانی لە راگەیەندراوێکدا بڵاویکردەوە، ئەمڕۆ ٢٠٢٠/٧/٢٩، لەشەقامی بازنەیی مەلیک مەحمود، نزیک سیتییەکانی گۆیژە، ئۆتۆمبێلێک لەئافرەتێکی دا و دواتر هەڵهات.
ئاماژەی بەوەشکرد، دوای گەیشتنی هێزەکانی پۆلیس و تیمە فریاگوزارییەکانی دیکە بۆ شوێنی ڕوداوەکە، ژنەکە گەیەندرایە نەخۆشخانە، بەڵام بەهۆی سەختی برینەکەیەوە گیانی لەدەستدا .
ئەوەشی خستەڕوو، دواتر ھێزەکانی پۆلیسی پارێزگای سلێمانی لێکۆڵینەوەکانیان دەستپێکرد بۆ دۆزینەوەی شۆفێری ئۆتۆمبێلەکە، توانرا لەماوەی کەمتر لە دوو کاتژمێر، لەلایەن مەفرەزەکانی بنکەی پۆلیسی ئازادییەوە ئۆتۆمبێلەکە بدۆزرێتەوە و شۆفێرەکەش دەستگیر بکرێت .
بەڕێوەبەرایەتی پۆلیسی پارێزگای سلێمانی راشیگەیاند، لەئێستادا تۆمەتبارەکە بەبڕیاری دادوەری لێکۆڵینەوە ڕاگیراوە و لێکۆڵینەوە لەڕوداوەکە بەردەوامە .
|