پۆلیسی هەولێر: ئەو کەسەی تەقەی لە سێ ئافرەت کردبوو دەستگیرکرا

هەولێر

بەڕێوەبەرایەتی پۆلیسی هەولێر رایگەیاند، ئەو کەسەی تەقەی لە سێ ئافرەت کردبوو دەستگیرکرا.

بەڕێوەبەرایەتی پۆلیسی هەولێر لە راگەیەندراوێکدا بڵاویکردەوە، دوای ئاگاداركردنەوەی بەشی پۆلیسی نەهێشتنی تاوانی هەولێر/ نووسینگەی رۆژهەڵات، لە رووداوێكی تەقەكردن لە شەقامی سەرەكیی هەولێر - كەسنەزان، بە سەرپەرشتیی بەڕێوەبەری پۆلیسی پارێزگای هەولێر، تیمێکی لێکۆڵینەوە پێکهێنراوە و دەستبەجێ گەیشتوونەتە شوێنی رووداوەکە.

ئاماژە بەوەشکراوە، دوای لێکۆڵینەوەکان دەركەوتووە كە تەقە لە سێ ئافرەت كراوە لەناو ئۆتۆمبێلێكی جۆری (نیسان ئاڵتیما) و زامدار بوون.

ئەوەش خراوەتەڕوو، دوای لێكۆڵینەوەیەكی ورد، توانراوە بە ماوەی (72 كاتژمێر) تەقەكەرەكە بە ناوی (ا.ا.ع) بدۆزرێتەوە و دەستگیر بكرێت.

بەڕێوەبەرایەتی پۆلیسی هەولێر راشیگەیاند، تۆمەتبارەکە بە ئۆتۆمبێلێكی جۆری (تۆیۆتا كرۆلا تەکسی) تاوانەكەی ئەنجامدابوو و دانیشیناوە بە تاوانەكەیدا، بۆیە بەپێی ماددەی (31/405) لە یاسای سزادان، بەند كراوە و دەستیش بەسەر ئۆتۆمبێل و كڵاشینكۆفی تۆمەتبارەكەدا گیراوە.