کەسوکاری نەخۆشێک لەهەولێر هێرشیان کردە سەر نەخۆشخانەیەک
وەزارەتی تەندروستی هەرێمی کوردستان ئیدانەی هێرشکردنە سەر نەخۆشخانەی فریاکەوتی ڕۆژئاوای هەولێر دەکات لە لایەن کەسوکاری نەخۆشێکەوە.
لە ڕاگەیەندراوێکدا وەزارەتی تەندروستی هەرێمی کوردستان بلاویکردەوە، چەند کەسێکی خانەوادەی نەخۆشێک هێرشی ناڕەوا و نابەجێیان کردووەتە سەر پزیشکێکی نیشتەجێ و کارمەندانی نەخۆشخانەکە لەکاتی ئەرکی مرۆڤدستانە و خزمەتکردنی هاوڵاتیان و قسەی نەشیاویان بە پزیشکان و کارمەندان و فەرمانبەران گوتووە تا ڕادەی لێدان .
وەزارەتی تەندروستی ئاماژەی بەوەشکردووە، وەزیری تەندروستی لەگەڵ وەزیری ناوخۆ و لایەنی پەیوەندار لەسەر هێڵ و پەیوەندی دایە و داوای پەلەی کرد بۆ دەستگیرکردنی تەواوی تاوانبارانی ئەم ڕوداوە و ڕەوانەکردنیان بۆ دادگا و سزادانیان و لێکوڵینەوە لە کەسانی کەمتەرخەم بۆ پاراستنی گیانی پزیشکان و کارمەندانی نەخۆشخانە .
لە کۆتایی ڕاگەیەندراوەکەدا ئاماژە بەوەشکراوە وەزیری تەندروستی پەیوەندی بە نەخۆشخانە و پزیشکی تاوان لێکراو کرد و پێیڕاگەیاندن کەوا تەواوی دامودەزگای پەیوەندار ڕێکاری یاسایی دەگرێتەبەر بۆ بەسزا گەیشتنی تاوانباران و پاراستنی شکۆی نەخۆشخانە و پزیشکان و کارمەندانی تەندروستی .
لەدوای بڵاوبوونەوەی ڤایرۆسی کۆرۆناوە، دیاردەی هێرشکردنە سەر پزیشکان و کارمەندانی تەندروستی و زیان گەیاندن بە کەلوپەلی نەخۆشخانەکان ڕووی لە زیادبوون کردووە.
|