حكومەتی هەرێم: داوا لەبەغدا دەكەین بودجە بنێرێت بۆ ئەوەی موچە بدەین
ئەنجومەنی وەزیرانی هەرێم داوا لە حكومەتی فیدڕاڵی دەكات ھەرچی زووە بەشە بودجەی ھەرێم خەرج بكات تا لە نزیكترین دەرفەتدا، لەگەڵ داھاتی ناوخۆی ھەرێم، موچە دابەش بكرێت.
ئەمڕۆ چوارشەممە 2020/9/30 ئەنجومەنی وەزیرانی هەرێمی كوردستان كۆبوویەوە و تیایدا هەر یەك لە ڕێبەر ئەحمەد وەزیری ناوخۆ و خالید شوانی وەزیری هەرێم بۆ كاروباری دانوستان، ڕاپۆرتێكیان دەربارەی دەستپێكردنەوەی دانوستان لەگەڵ حكومەتی فیدرالی سەبارەت بە ناوچە كوردستانییەكانی دەرەوەی هەرێمی كوردستان پێشكەش كرد.
ئەنجومەنی وەزیران نەخشەڕێگا و پلان و ڕاسپاردە پێشنیاركراوەكانی راپۆرتی ئەو دوو وەزارەتەی پەسەندكرد و لیژنەكەشی ڕاسپارد بۆ دەستپێكردنی جێبەجێكردنی و بەردەوامیدان بە هەوڵەكانی پێشوو لەم دۆسیەدا و سەردانكردنی دەسەڵاتە فیدڕاڵییەكان لە بەغدا لە نزیكترین دەرفەتدا و كاركردنی جدی بۆ جێبەجێكردنی ماددەی 140 ی دەستوور.
هەر لەو كۆبوونەوەیەدا ئامانج ڕەحیم، سكرتێری ئەنجومەنی وەزیران، ڕوونكردنەوەی یاسایی و دارایی دەربارەی موچە لە كابینەی نۆیەمی حكومەتی هەرێمی كوردستان خستەڕوو.
ئەنجومەنی وەزیران داوای لە حكومەتی فیدڕاڵی كرد "هەرچی زووە بەشە بودجەی هەرێم خەرج بكات تا لە نزیكترین دەرفەتدا ، لەگەڵ داهاتی ناوخۆی هەرێم، موچە دابەش بكرێت".
ئەنجومەنی وەزیران "پێشنیاری وەزارەتی دارایی و ئابووریشی پەسەندكرد بۆ زیادكردنی تەمویلی موچەی داھاتوو بۆ 82٪ لە بری 79٪ و كەمكردنەوەی ڕێژەی ڕاگرتنی تەمویل لە 21٪ بۆ 18٪".
|