گۆڕێکی بە کۆمەڵی ژنانی ئێزدی لە شنگال هەڵدرایەوە
تیمی نیشتیمانی بۆ هەڵدانەوەی گۆڕە بە کۆمەڵەکان لە عێراق، ئەمڕۆ گۆڕێکی بە کۆمەڵی ژنانی ئێزدیان لە قەزای شنگال هەڵدایەوە.
میدیا عێراقییەکان بڵاویانکردەوە، گۆڕەکە دەکەوێتە ناوچەی "سۆلاغ"ی دەروازەی قەزای شنگال و ڕوفاتی ٨٠ ژنی ئێزدی تیدایە.
گۆرەکە زۆربەیان ژنی بەتەمەن بوون و لە کاتی داگیرکردنی شنگال لە لایەن چەکدارانی داعشەوە لە ساڵی ٢٠١٤ بە کۆمەڵ کوژراون و لە گۆڕە بە کۆمەڵەدا شاردراونەتەوە.
هەڵدانەوەی گۆڕی ئەو ژنە ئێزدیانە بە هاوکاری تیمێکی وەزارەتی کاروباری شەهیدان و ئەنفالکراوی هەرێمی کوردستان و دامەزراوەی شەهیدانی عێراق، بە هاوکاری لەگەڵ ڕێکخراوی (ICMP ) و بە ئامادەبوونی چەند کەسایەتییەکی ئێزدی و نوێنەرانی دامەزراوە و فەرمانگە جیاجیاکانی دەوڵەت و ئەنجومەنی روحانی ئێزدی و نوێنەرانی کەسایەتییە جیاجیاکان لەسەرجەم پێکهاتە ئاینییە جیاجیاکان.
لە مانگی حوزەیرانی ساڵی ٢٠١٤دا چەکدارانی داعش هێرشیانکردەوە سەر شاری موسڵ و قەزاو ناحیەکانی دەوروبەر و داگیریانکرد، دوای ڕۆژێک لە هێرشەکە هەڵمەتێکی کوشتن و دەستگیرکردن و بە کەنزەک کردنی هاوڵاتیانی ئێزدی شنگال دەستی پێکرد و بە سەدان هاوڵاتی ئەو پێکهاتە ئاینییە لەسەر چەکدارانی داعش کوژران و بێسەروشوێن کران، بەشێک لە ژن و کچەکانیانیشیان لە بازاڕدا وەک بەندە و کۆیلەی سێکس مامەڵەیان پێوەکرا.
|