وشەیەک بنوسە بۆ گەران .

سبەینێ دەست دەكرێت بە هەڵدانەوەی گۆڕە بەكۆمەڵەكانی دەستی داعش

یەكەمین شوێن گوندی كۆچۆ دەبێت و نەتەوەیەكگرتووەكان سەرپەرشتی دەكات

ژیان: 

رێكخراوی یونامی لەگەڵ حكومەتی عێراق دەست دەكەن بە هەڵدانەوەی گۆرە بەكۆمەڵەكانی شەنگال و یەكەمین گوندیش لە كۆچۆوە دەست پێدەكرێت. 

رێكخراوی یونامی سەر بە نەتەوە یەكگرتووەكان رایگەیاند: تیمیی لێكۆڵینەوەی سەربەنەتەوە یەكگرتووەكان بۆ پتەوكردنی لێپرسینەوە لە تاوانەكانی داعش (یونیتاد)، هاوكاریی حكومەتی عێراقی دەكات لە دەرهێنانی ڕووفاتی قوربانییەكانی داعش و ئەوەش دەبێتە یەكەم كاری دەرهێنانی ڕووفاتی قوربانیان لە قەزای شەنگال.

ئەو رێكخراوە راشیگەیاندووە كاری دەرهێنانی ڕووفاتی قوربانییان لە ڕێوڕەسمێكدا بەڕێوە دەچێت و سەركردە ئایینییەكانی ئێزدی لەگەڵ بەرپرسانی باڵای حكومەتی عێراق ئامادەی دەبن.

كەریم ئەسعەد ئەحمەد خان، ڕاوێژكار و سەرۆكی تیمی (یونیتاد) وتوویەتی "سبەی رۆژی هەینی 15/3/2019 دەبێتە ڕۆژێكی گرنگ، چونكە یەكەم كاری دەرهێنانی ڕووفاتی قوربانیانی دەستی داعش ئەنجام دەدرێت لە یەكێك لە گۆڕە بە كۆمەڵەكانی قوربانیانی داعش".

بە گوێرەی لیدوانی ئەو بەرپرسە سەبر و نەرمونیانی ڕزگاربوانی دەستی داعش لەبەر چاودەگرێت، چونكە ماوەیەكی درێژە چاوەڕوانی كاری دەرهێنانی ڕوفاتی قوربانیان دەكەن، كۆكردنەوەی بەڵگە پێشەنگی كاری تیمی (یونیتاد) دەبێت بە شێوەیەك لەگەڵ ئاستە نێودەوڵەتییەكان دەگونجێت.