وشەیەک بنوسە بۆ گەران .

كچێكی تەمەن 11 ساڵ لەبری قەرزی باوكی دەكرێتە هاوسەری پیاوێكی 50 ساڵ

منداڵ؛ قوربانییە بەردەوامەكە
ژیان:

كچێ تەمەن 11 ساڵی خەڵكی ئیلام لە رۆژهەڵاتی كوردستان، لەبری قەرزی 15 ملیۆن تمەنی باوكی لەگەڵ پیاوێكی تەمەن 50 ساڵ هاوسەرگیری پێدەگرێت و ئەوەش ئاشكرا دەكرێت، لەئێستادا ئەو كچە باری دەروونی تێكچووە.

بەپێی ڕاپۆرتێكی رێكخراوی مافی مرۆڤی هەنگاو، لەماوەی رابردوودا لە یەكێك لە گوندەكانی بەخشی (زەردەڵان و هەلیلان)ی پارێزگای ئیلام، كچێكی تەمەن 11 ساڵ لە جیاتی قەرزی باوكی (بڕی 15 میلیۆن تمەن) لەگەڵ پیاوێكی تەمەن 50 ساڵ بە ناوی (سەفەرعەلی ڕەزایی) كە 39 ساڵ لە خۆی گەورەترە بەناچاری هاوسەرگیری پێكراوە.

ئەو رێكخراوە ئاماژە بەوەش دەكات، لەئێستادا ئەو كچە تەمەن 11 ساڵە تووشی چەندین نەخۆشی جۆراوجۆر بووە و لەوبارەیەشەوە چالاكوانێكی ئاگادار ئەوەی بە هەنگاو ووتووە "زارا ئێستا نیشتەجێی گوندی (پەیامنی زەردەڵان)ی ئیلامە و تووشی كێشەی دەروونی بووە و بەدەست ئازاری پشتییەوە دەناڵێنێت كە هۆكارەكەشیی ئەوەیە توانایی ئەو پەیوەندییە نیە كە لەگەڵ مێردەكەی هەیەتی".

چالاكوانانی ناوچەكە  وەك خۆیان باسیان لێوەكردوە، ئەوان سەردانی چەندنی ناوەندی پەیوەندیداریان كردووە، بەڵام هەتاوەكو ئێستا هیچ دەسكەوتێكیان نەبووە، هاوكات رۆژنامەنوسێكیش ئەوەشی خستۆتەڕوو، بە هۆی هەژاری و كێشەی ئابووری و ئەوەی كە بەشێكی زۆر لە دانیشتوانی بەخشی زەردەڵان و هەلیلان لەلایەن حكوومەتەوە ناسنامەیان پێ نەدراوە، هەتا ئێستا چەندین حاڵەتی لەم شێوەیە بیندراوە و ترسی ئەوە هەیە كە ببێتە دیاردە و لە نێو كۆمەڵگادا بكرێتە باو و منداڵان و كچانی ناوچەكە وەكوو كاڵا بفرۆشرێن".

رێكخراوەكە جەخت لەوەش دەكاتەوە، ئەوان وەك ناوێكی خوازراو ناوی (زارا)یان بەكارهێناوە لەبری ناوی ڕاستی قوربانییەكە.