جوان ئیحسان بۆ ژیان: مراعاتی رەنج سەنگاویم كرد

PM:02:34:16/04/2018
ژیان: زانكۆ سەردار
سەرۆكی لیستی یەكێتی بۆ هەڵبژاردنەكانی عێراق لە پارێزگای سلێمانی ڕایدەگەیەنێت، ئەو هەستی بەوە كردوە كە لەمیانی دیدارەكەدا كەمینیان بۆ دانابێت و جەخت لەوەش دەكاتەوە، هاوسەنگی لەبەرنامەكەدا ڕانەگیراوە.

د.كتۆرە جوان ئیحسان، سەرۆكی لیستی یەكێتی بۆ هەڵبژاردنەكانی عێراق لەپارێزگای سلێمانی، لەبارەی بەرنامەیەكی لەگەڵ كەناڵێكی نزیك لەپارتی دیموكراتی كوردستان كە لەبارەی (وەزیری مافی مرۆڤی عێراقە)ەوە پرسیاری لێكرا بە (تۆڕێ‌ میدیایی ژیان)ی ووت"لەئێستادا هەڵمەتی هەڵبژاردن هەیە، ئێمەش كە كاندیدین یاساییە لەهەرشوێنێك و هەر بەرنامەیەك بیروڕاكانمان بزانرێت، بەڵام ئەوەی كە پێم سەیر بوو شێواز و ئاڕاستەكردنی پرسیاركردنەكە بوو".

جوان ئیحسان جەخت لەوە دەكاتەوە، ئەو لەسەرەتای پرسیارەكەدا موراعاتی (رەنج سەنگاوی) كردوە و نەیویستوە پرسیارەكەی بۆ راست بكاتەوە، دەڵێت"من لەسەرەتادا موراعاتی پێشكەش كارەكەم كرد، پێم خۆش نەبوو بڵێم (وەزارەت نیە بەڵكو ئێستا دەستەیە)، وتم ڕەنگ هەڵەیەك هەبێت، ئەوە لەكاتێكدا دەبوو ئەو مراعاتی من بكات كە میوان بووم، بەڵام دوای ئەوەی بۆم دەركەوت كە ئەوە وەك تاقیكردنەوەیەكە، یاخود وەك دانانی كەمینێك وایە، ئەو كاتە تێگەیشتم كە بیری بهێنمەوە بەڵێ‌ مافی مرۆڤ وەك و دەستە لە هەرێمی كوردستان و عێراق هەیە، دیارە لەوە دەچێت زانیاری ئەوان كەمتر بێت".

سەرۆكی لیستی یەكێتی باسلەوە دەكات، لەبەرنامەكەدا هاوسەنگی بونی نەبووە و ئاماژە بەوەش دەكات، پێشكەشكاری بەرنامەكە نەیهێشتوە وەڵامەكان وەك پێویست بۆ پرسیاری ئامادەبووان بداتەوە "هەستم دەكرد لە كردنی پرسیارەكاندا مەبەستێك هەیە، لەلایەكی دیكەشەوە لەنێو ئامادەبوواندا پرسیاری زۆر دەكرا، كە كاكە رەنج هیچ بواری وەلامدانەوەی نەدەدا"، جوان ئیحسان وەهای ووت.

ئەو بەرپرسەی یەكێتی ئەوەش رووندەكاتەوە، كە پرسیار پێویستی بە وەڵامە نەك هاتوهاوار و قسە پێبڕین و لەنێوان وتاری بانگەشە و پێشكەشكردنی بەرنامەدا جیاوازی زۆر هەیە، بۆیە پێشی وایە شێواندنی پرسیار مایەی قبوڵ كردن نیە.

دكتۆرە جوان دەشڵێت"ئەگەر ئەوەنە ئەوان لەمن بترسن وای بۆدەچم هەندێك شت هەیە لەسەر من هێشتا نەیان بینیوە، هەڵبەتە منیش پرۆگرامی خۆمم هەیە، پاشان سوپاسیان دەكەم كە ئەوەنە حسابیان بۆكردووم و منیش حسابم بۆ زۆر شتیان كردوە".

هەروەها وتیشی"ئێمە كێشەیەكمان نیە و ڕاست و دروستی ڤیدۆكەش لای خۆیان هەیە، ئەوەی بڵاویان كردۆتەوە تەنها ئەوەیە كە خۆیان مەبەستیانە، بەڵام وەڵامەكە لەناو هەمان ڤیدیۆدایە بەجیاوازی چەند سانیەیەك".


زۆرترین خوێنراو‌