تاشچی بۆ (ژیان): حزبەكانی باشور هەنگاوی بۆ كۆنگرەی نەتەوەی نانێن

PM:03:36:16/04/2018
ژیان: زانكۆ سەردار، فۆتۆگراف: هاوژین غەریب
ئیمام تاشچی ئێر، پەرلەمانتار‌و ئەندامی وەفدی پارتی دیموكراتی گەلان بۆ هەرێمی كوردستان، گلەی لە حزبەكانی هەرێمی كوردستان هەیە، لەسەر ئەوەی "هەموو هێزەكان دەڵێن پێویستمان بەیەكێتی نەتەوەییە، بەڵام هەنگاو ناهاوێژرێت بۆ ئەو مەبەستە".

وەفدێكی هەدەپە هەفتەی رابردو بەسەردانێكی سێ رۆژە هاتنە هەرێمی كوردستان‌و لەگەڵ حزب‌و پارتە سیاسیەكان كۆبوونەوە، ئیمام تاشچی ئێر، لەچاوپێكەوتنێكدا لەگەڵ (ژیان) باس لە ناوەڕۆكی دیدارەكان‌و دۆخی پارتەكەی لە باكوری كوردستان دەكات.

ئیمام، پێدگری لەسەر بەستنی كۆنگرەی نەتەوەیی دەكاتەوە‌و دەڵێت ئەگەر یەكێتی كورد دروست نەبێت هەموو كەس دەتوانێت كورد تێكبشكێنێت و ڕەتیدەكاتەوە، پارتەكەی لەبەرامبەر ڕووداوەكانی عەفرین‌و هەرێمی كوردستان بێدەنگ بوبێت"هەدەپە بێدەنگ نییە رووبەڕووی گوشارێكی زۆربووەتەوە هەر كەس بێتە سەر شەقام‌و بیەوێت چالاكی مەدەنی بكات حكومەت بەزووترین كات دەیخاتە زیندانەوە".

ژیان: لەهاتنتان بۆ باشوری كوردستان تەواوی هێزەكانی باشوری كوردستانتان بینی، دیدارەكان چۆن بوون‌و بەچی گەیشتن؟

ئیمام تاشچی ئێر: سیاسەتی ئێمە ئەوەیە لەگەڵ تەواوی گەلی كورد پەیوەندیمان هەیە. بۆ هێزەكانی باشوری كوردستانیش پەیوەندییەكانمان بەردەوامن، باشوری كوردستانیش وەكو باكوری كوردستانە لێكدابڕان هەیە، داخوازی ئێمە ئەوەیە كە ئەو هێزو پارتیانەی هەن یەكگرتوو بن‌و رێككەوتنیان لەنێواندا هەبێت، ئەم كێشەیەش لەهەر چوار بەشی كوردستان هەیە، ئێمە دەمانەوێت لەهەموو پارچەكان هێزەكان بێنە لای یەكتری‌و رێككەوتنی یەكێتی نەتەوەیی ئامادە بكەن، ئێمە بۆ ئەو مەبەستەش هاتینە باشوری كوردستان.

پێویستمان بەچەترێكە تا هەموو پارتەكانی لەژێردا كۆببنەوە


ژیان: دیداری ئێوە لەگەڵ هەندێك لایەنی باشور بەرووی راگەیاندنەكاندا داخراو دوای كۆبونەوەتان لەگەڵ ئەو لایەنانە كۆنگرەی رۆژنامەوانیتان نەبەست، ئەنجامی ئەو كۆبونەوانەتان چۆن بوو؟

ئیمام تاشچی ئێر: ئێمە لەگەڵ هەموو هێزەكان دانیشتین، هەموو هێزەكان دەڵێن پێویستمان بەیەكێتی نەتەوەییە، بەڵام هەنگاو ناهاوێژرێت بۆ ئەو مەبەستە، بەڵام ئەو هەنگاوە لەناو گەلدا هاوێژراوەو رێككەوتنی كوردان هەیە، نموونەش ئەو هێرشە داگیركارییەی سەر عەفرین بوو دڵی هەموو كوردێكی ئێشاند، بەڵام پارتەكان ئەگەر لەبەر بەرژەوەندی حزبی خۆیان ئەوەش نەكەن ئەمما گەل ئەوەیان لێدەخوازێت، لەباكورو تەواوی پارچەكانی تری كوردستان هەر وایە. گەلی كورد باوەڕی بەوە هێناوە ئەگەر یەكێتی كورد دروست نەبێت هەموو كەس دەتوانێت كورد تێك بشكێنێت، بەڵام پارتە سیاسیەكان كەموكورتیان هەیە، هیوادارین بەم جۆرە سەردانانە ئەو كەموكورتیانە كۆتاییان پێی بێت، پێشتریش لە ساڵی ٢٠١٣دا هەوڵمانداو كۆمیتەی ئامادەكاریشمان دروستكرد من بۆ خۆم ئەو كاتە لەو كۆمیتەیە ئەندام بووم، بەڵام ئەو كاتە سەری نەگرت هەرچەندە نزیكیش بوینەوە لەبەستنی كۆنگرەی نەتەوەیی، تۆ بڕوانە ئەو هێرشانەی لە باكور كرایە سەر گەلی ئێمە لەنوسەیبین‌و ناوچەی سوری ئامەدو شوێنەكانی تر هەمان ئەو هێرشانە لەكەركوك‌و شەنگال‌و ناوچەكانی باشوری كوردستانیش كرا، لەرۆژئاواش لەعەفرین كراو دەیانەوێت زۆر ناوچەی تریش رووبەرووی هێرش بكەنەوە، ئێمە هەر نەبێت پێویستمان بەچەترێكە تا هەموو پارتەكانی لەژێردا كۆببنەوە، ئیتر دواتر بە شێنەیی كۆنگرەی نەتەوەیی دەبەستین.

ژیان: هەڵوێستی حكومەتی هەرێمتان چۆن هەڵسەنگاند؟

ئیمام تاشچی ئێر: ئێمە چوینە لای بەرێز كاك مەسعود بارزانی‌و لەحكومەتی هەرێمیش كاك نێچیرڤانمان بینی، ئەوانیش وەك هەموو هێزەكانی تر بە پێویستی دەزانن كۆنگرەی نەتەوەیی ببەستین، بەڵام هەنگاو نییە بۆ ئەو كارە‌و ئێمە بۆ ئەوە لێرەین بۆ ئەوەی ئەو هەنگاوە بهاوین، چونكە لەداهاتوودا رۆژهەڵاتی ناوەڕاست لەگۆڕانكاریدایە دەبێت خۆمان ئامادە بكەین.

ماوەی سێ ساڵە هیچ زانیارییەكمان لەسەر بەرێز ئۆجەلان نییە


ژیان: با دۆخی تەندروستی عەبدوڵا ئۆجەلان رابەری زیندانیكراوی پەكەكە بپرسین، دۆخی تەندروستی ئەو چۆنە لەئێستادا؟

ئیمام تاشچی ئێر: ماوەی سێ ساڵە هیچ زانیارییەكمان لەسەر بەرێز ئۆجەلان نییە، نە پارێزەرەكانی ئەو نە كەسوكاری‌و بەرپرسانی زیندان‌و دەسەڵاتدارانی توركیا سەردانیكردنیان قەدەغە كردووە. دوو ساڵ لەمەوبەر كۆمیتەی نێونەتەوەیی دژی ئەشكەنجە سەردانیان كرد، بەڵام لەوكاتەوە تا ئێستا ئەوانیش سەردانیان نەكردۆتەوەو دوای ئەو ماوەیەو لەم كۆتاییانەدا ئەو كۆمیتەیە راپۆرتێكی لەسەر رەوشی ژیانی بەرێز ئۆجەلان بڵاوكردەوە.

ژیان: تاچەند هەوڵتانداوە دیداری ئۆجەلان بكەن لەزیندان؟

ئیمام تاشچی ئێر: ئەو كۆمیتەیە كە چونە لای دەبوو هەر ئەوكات راپۆرتی خۆیان بڵاوبكردایەتەوە، بەڵام بڵاوكردنەوەی راپۆرتەكەیان دواكەوت‌و لەماوەی رابردوودا راپۆرتەكەیان بڵاوكردەوە. بەردەوام پارێزەرەكانی داوای بینینی دەكەن، بەڵام دەوڵەت بەبیانوی خراپی كەشوهەواو بیانووی جۆراو جۆرەوە هەموو دیدارێكی عەبدوڵا ئۆجەلان رەتدەكەنەوە.

رۆژهەڵاتی ناوەڕاست لەگۆڕانكاریدایە دەبێت خۆمان ئامادە بكەین


ژیان: رەوشی هەدەپە لەباكورو توركیادا چۆنە؟

ئیمام تاشچی ئێر: لەراستیدا هەدەپە وەك رێكخستن لەژێر گوشارێكی زۆردایە، زۆرینەی پەرلەمانتارەكانمان لەزینداندان، نزیكەی ١٠٠ سەرۆكی شارەوانیمان لەزینداندایەو لەشوێنی ئەوان بەكاتی خەڵكیان هێناوەتە شوێنیان، نزیكەی ١١هەزار ئەندامی هەدەپە لەزینداندایە، بەهەموو شێوەیەك لەژێر گوشارداین، بەڵام هەدەپە هەر بەرخۆدانی خۆی بەردەوامی پێدەدات چونكە بە باوەڕین كە سەركەوتن هەر بۆ ئێمەیە.

ژیان: هەدەپە بۆ بێدەنگە؟ لەهێرشەكانی سەر عەفرین لە لەشكركێشی بۆ سەر باشوری كوردستان؟

ئیمام تاشچی ئێر: هەدەپە بێدەنگ نییە بەڵكو هەدەپە رووبەڕووی گوشارێكی زۆر بووەتەوە هەر كەس بێتە سەر شەقام‌و بیەوێت چالاكی مەدەنی بكات حكومەت بە زوترین كات دەیخاتە زیندانەوە، ئەمە وایكردووە وا دەربكەوێت هەرچی خەڵكی چالاك‌و بەرێوەبەرایەتی هەدەپە هەیە لەزیندانەكانن.

زۆرینەی پەرلەمانتارەكانمان‌و نزیكەی ١٠٠ سەرۆكی شارەوانیمان لەزینداندایە


ژیان: هۆی چییە دەسەڵاتدارانی توركیا چالاكییەكانی هەدەپەو كاری سیاسی هەدەپەیان قەدەغەنەكردووە؟ ئێوە ترستان لەداخستنی حزبەكەتان نییە؟

ئیمام تاشچی ئێر: دەزانیت لەساڵانی١٩٩٣ بەدواوە دەیان پارتی كوردی دروست كرا، بەڵام دەسەڵاتدارانی توركیا هەر ساڵە‌و پارتێكیان دادەخست، ئێستا دەوڵەت سیاسەتی خۆی گۆڕیوە، جاران پارتەكانی دادەخست ئێستا پارتەكان دەهێڵێتەوە بەڵكو ئەندامەكانی‌و بەرپرسەكانی دەگرێت. بەمەش دەیەوێت پارتەكان بهێڵێتەوە بەس بە بچوكی‌و بەبێ هێزی، بۆیە ئەمەش گۆڕانی سیاسەتی حكومەتە بۆ رووبەڕووبوونەوەی رێكخستنە نەیارەكانی دەوڵەت خواستیەتی سیاسەتی نەژادپەرستی خۆی سەربخات بۆیە شەریكیشی هەیە كە شەریكەكەی مەهەپەیە _پارتێكی نەژاد پەرستی توركیا_ئەوان پشتیوانی بڕیارە نەژاد پەرستیەكانی ئاكەپە دەكەن.

ژیان: ئەی جەهەپە رۆڵی چییە لەو نێوەندەدا؟

ئیمام تاشچی ئێر: جەهەپە شوێنكەوتەی ئەوانە، ئەوان سیاسەتە نەژادپەرەستیەكە بەڕێوە دەبەن، بەڵام جەهەپە شوێنیان دەكەوێت هەرچەندە ئۆپۆزسیۆنیشە بەس لەبابەتی نەژادپەرەستیدا شوێنكەوتەی ئەو دوو لایەنەیە كە پێكەوە هاوبەش‌و شەریكن.

پرۆفایل:

ئیمام تاشچی ئێر

لە 1ی مانگی ئۆكتۆبەری ساڵی ١٩٥٩ لەناوچەی بسمیل لەشاری ئامەد لەدایكبووە

پسپۆڕی بواری چاندو پەروەردەیە 

لەساڵی ١٩٩٣دا لەلایەن گروپی كۆنترا گەریلا هێرشی دەكرێتە سەرو دوو هاوڕێی لەو هێرشەدا گیانلەدەستدەدەن‌و خۆشی بەسەختی بریندار دەبێت

دامەزرێنەری DDKD لەساڵی ٢٠٠٥دا و بووە سەرۆكی ئەنجومەنی بەرێوەبردنی
خیزاندارەو دوو منداڵی هەیە

لەدواین هەڵبژاردنی توركیا بووە ئەندامی پەرلەمانی توركیا لەسەر لیستی هەدەپە



ئه‌م بابه‌ته 396 جار خوێنراوه‌ته‌وه‌‌