وڵاتانی ئەوروپا سنورەكانیان كۆنتڕۆڵ دەكەن

PM:06:57:05/01/2017
بڕیارە پەرلەمانی ئەوروپا لە ماوەی شەش مانگی یەكەمی ئەمساڵدا چەندین پرسی گرنگی تایبەت بە ووڵاتانی یەكێتی ئەوروپا تاوتوێ‌ بكات و یەكێك لەو پرسانەش، بابەتی كۆچبەران و پێداچوونەوەیە بە ڕێكەوتنامەی "دبلی" تایبەت بە پەناخوازان.

ئاژانسی هەواڵی ئی یو ڕیپۆرتەر بڵاوی كردەوە، پێشنیاری ئەوە دەكرێت كە ئەو میكانیزمە بەپەلەیەی كە ڕێگە بە ووڵاتانی یەكێتی ئەوروپا دەدات هەر یەكێكیان بەشێویەكی كاتی سنورەكانیان كۆنتڕۆڵ بكەن، دەستبەجێ‌ بخرێتە بواری جێبەجێكردنەوە سەبارەت بەپرسی ژمارەی ئەو پەناخوازانەی كە هەر ووڵاتێك وەریدەگرێت.

پێشتر چەندین پێشنیاری جۆراوجۆر لەساڵی ڕابردوودا بووبووە جێگەی مشتومڕی سیاسی نێوان پارت و دامەزراوەجیاوازەكانی ناو یەكێتی ئەوروپا، لەوانەش بەهەندوەرگرتن و كۆپیكردنی سیاسەتە توندەكەی ئوسترالیا لەبەرامبەر كۆچبەرانی دەریایی قاچاخدا كە خۆی لە دیپۆرتكردنەوەی ئەو كۆچبەرانەدا دەبینێتەوە بۆ ئەو ووڵاتەی بەبەلەمەكە لێوەی هاتوون، بەڵام لەئێستادا پێشنیارەكان بەو ئاڕاستەیە دەڕۆن ووڵاتانی یەكێتی ئەوروپا دانبنێن بە پێودانگەكانی یەكتریدا لەبارەی پرسی پەنابەرانەوە و میكانیزمێكیش بدۆزنەوە بۆ دابەشكردنی پەناخوازان بەسەر هەموو ووڵاتانی یەكێتیەكە بەئامانجی كەمكردنەوەی ئەو فشارە زۆرەی كەبەزۆری  بەتەنها لەسەر بەشێك لە ووڵاتانی یەكێتی ئەوروپایە.

هەروەها بەرەنگاربوونەوەی تیرۆر و پرسی خۆدزینەوە لە باج و یەك بازاڕی دیجیتاڵی و گۆڕانكاری لەكەش و هەوادا، ئەو پرسانەی ترن كە پێدەچێت پەرلەمانی یەكێتی ئەوروپا لە ئەمساڵدا تاوتوێیان بكات.