قایمقامییەتی سلێمانی ئاماری كارو چالاكیەكانی مانگی رابردووی بڵاوكردەوە

AM:10:27:06/12/2018
ژیان:
لیژنە هاوبەشەكانی قایمقامییەتی سلێمانی ئاماری كارو چالاكیەكانی مانگی رابردووی بڵاوكردەوە و رایگەیاند، شەش شوێن بەهۆی ئەنجامدانی سەرپێچییەوە داخراون.

لەراگەیەندراوێكدا كە وێنەیەكی دەست (تۆڕی هەواڵی ژیان) كەوتووە، قایمقامییەتی سلێمانی رایگەیاندووە" مانگی (تشرینی دووەم/11) لیژنە هاوبەشەكانیان  سێ هەزار و 719 سەردانیان بۆ شوێنە گشتییەكان ئەنجام داوە، لە كۆی ئەو سەردانانەشدا بەهۆی پابەندنەبوون بە مەرج و رێنماییە تەندروستی و ڤیترنەرییەكانەوە 490  شوێن ئاگاداركراونەتەوە كە پابەندی مەرج و رێنماییەكان بن.

ئاماژە بەوەشكراوە" 272 شوێنیش سزای ماددی دراون هەروەها بەهۆی بەردەوام بوون لەسەر سەرپێچی شەش شوێن داخراون".

لە ئاماری لیژنە هاوبەشەكاندا هاتووە" لە مانگی تشرینی دووەمدا، زیاتر 53 تۆن و 200  كیلۆگرام مەواد و خۆراكی ماوەبەسەرچوو بە بڕیاری قائیمقامی سلێمانی لەناوچەی تانجەرۆی شاری سلێمانی لە ناوبراون".

هەروەها كۆی گشتی پارەی غەرامەكراویش بریتییە لە هەشت ملیۆن و 500 هەزار دینارە و پێی یاسا دەخرێتەوە سەر داهاتی گشتی.

بە پێی ئەو رێنماییانەی لیژنە هاوبەشەكان كاری پێ دەكەن هەرشویێنێكی كاركردن پابەند مەرجەكانی تەندروستی ڤێتێرنەری و بازرگانی نەبێت، سەرەتا ئاگادار دەكرێتەوە، دواتر سزای ماددی دەدرێت، و لە حاڵەتی دووبارەكردنەوەی سەرپێچیەكاندا دادەخرێن و پاشان رووبەرووی دادگا دەكرێنەوە.


زۆرترین خوێنراو‌