فرسەت ئەحمەد، لە وەڵامی ئەو نوسراوەی رێواز فایەق سەرۆكی پەرلەمانی كوردستان بۆ هەڵوەشاندنەوەی بڕیاری ژمارە 4ی ساڵی 2020 ئاراستەی سەرۆكایەتی ئەنجومەنی وەزیرانی كردبوو دایەوە و رەتیدەاتەوە بڕیارەكەی لە رۆژنامەی وەقایع بڵابكەنەوە.
نوسراوەكەی وەزارەتی داد لە رۆژی 29-06-2020 دەرچووە و واژۆی وەزیری دادی لەسەرە و ئاراستە سەرۆكایەتیی پەرلەمانی كوردستان كراوە و تیایدا دەڵێت: بڕیارەكەی سەرۆكی پەرلەمان پێچەوانەی رێسای گشتی پلەبەندی یاسایی (سلم التدرج القانونی) دەرچووە.
وەزیری داد وتوشیەتی" بەداخەوە كە بە بەڕێزتانی رادەگەیەنین كە داوای لێبووردن دەكەین و ناتوانین بڕیارەكە لە رۆژنامەی فەرمی بڵاوبكەینەوە ".
فرسەت ئەحمەد لەبارەی بڕیارەكەی سەرۆكی پەرلەمانەوە دەشڵێت بڕیارەكە "بە بڕیارێكی نەبوو دادەنرێت و بەپێی یاسای بڵاوكردنەوەی رۆژنامەی وەقایعی كوردستان بۆ بڵاوكردنەوە ناشێت".
پێشیوایە بڵاوكردنەوەی ئەو بڕیارە: دەبێتە مایەی رەخنە و پێشینەیەكی ترسناك لەسەر پەرلەمان و سەرۆكایەتی و سیستەمی سیاسی هەرێم. هەروەها لەسەر وەزارەتی داد بەسەرپێچی لە رێسای گشتی و حكومەكانی یاسا تۆماردەكرێت.
دوێنێ دووشەممە نوسینگەی سەرۆكی پەرلەمانی كوردستان روونكردنەوەیەكی بڵاوكردەوە و رایگەیاند، سەرۆكی پەرلەمانی كوردستان جەخت لەسەر هەڵوێستی پێشووی دەكاتەوە سەبارەت بە هەڵوەشاندنەوەی بڕیاری ژمارە (4) ی ساڵی 2020 كە بڕیارمان بە نووسراوی ژمارە (4/3/1001 لە 25/6/2020) ئاڕاستەی سەرۆكایەتی ئەنجوومەنی وەزیران كراوە بە مەبەستی بڵاوكردنەوەی لە رۆژنامەی فەرمی وەقایعی كوردستان، بۆ ئەوەی سیفەتی ئیلزامی وەربگرێت.