دوو پەرلەمانتاری کورد لە پەرلەمانی عێراق سەبارەت بە رووداوەکانی ئەم دوایەی ناحیەی شیلادزێ نامەیەکیان ئاراستەی سەرۆک وەزیرانی عێراق کرد و رایانگەیاند، پارتی هەوڵی سەرکوتکردنی خەڵکی ئەو ناوچەیە دەدات.
غالب محەمەد عەلی و سەرکەوت شەمسەدین لە سەرەتای نامەکەیاندا نوسیویانە، دەمانەوێ سوپاست بکەین بۆ بەدەمەوەهاتنی داواکاری پێشومان بۆ ئیدانەکردنی هێرشەکانی تورکیا و هەوڵی بردنی کەیسەکە بۆ ئەنجومەنی ئاسایش.
ئاماژەیان بەوەشکردووە، ئەوە هەنگاوێکی نیشتیمانی ئازایانەیە، ئەگەر هەنگاوی کرداری بنێیت، ئێمە پشتیوانیت دەکەین و دڵنیام گەڵی کوردستان و تەواوی عێراقیش پشتیوانت دەبن .
دەشڵێن، بابەتێکی تر کە دەمانەوێت سەرنجتی بۆرابکێشین، هەوڵەکانی پارتی دیموکراتی کوردستانە بۆ سەرکوتکردنی خەڵکی ناحیەی شیلادزێ-ی سەر بە پارێزگای دهۆک، کە زیاتر لە ۲٠ ساڵە بەدەست بۆردومانی سوپای تورکیاوە دەناڵێنن و بەدەیان قوربانیان داوە .
ئاشکراشیانکردووە، لەلایەن ژمارەیەکی زۆر چالاکوان و دانیشتوی ناحیەی شیلادزێوە ئاگادارکراونەتەوە کە پارتی دیموکراتی کوردستان بۆ سەرکوتکردنی ئەم شارە هێزی چەکداری رۆژ، کە هاوڵاتی سوریان، لە شارەکە بڵاوکردووتەوە و شارەکە کراوەتە سەربازگە .
غالب محەمەد عەلی و سەرکەوت شەمسەدین داواشیان لە سەرۆک وەزیرانی عێراق کردووە، لێکۆڵینەوەی جدی لەو بابەتە بکەن و خەڵکی شیلادزێ بپارێزن .
زیاتر لە دوو هەفتەیە سوپای تورکیا بە بیانووی لێدان لە گەریلاکانی پارتی
کرێکارانی کوردستان (پەکەکە)، لە زەوی و ئاسمانەوە هێرش دەکاتەسەر سنورەکانی
شیلادزێ و ئامێدی و زاخۆ لە پارێزگای دهۆک و بەوهۆیەشەوە ژمارەیەک هاوڵاتی
شەهیدبوون و زیانی ماددی زۆریش بەر دانیشتووانی ناوچەکە گەیشتووە.