ڕێكخراوی تەندروستی جیهانی ڕایگەیاند، تا ئێستاش فایرۆسی كۆرۆنا نەگەیشتووەتە لوتكەی بڵاوبوونەوە، بەڵام هۆشداریدا لە خێرایی بڵاوبوونەوەکەی .
تیدروس ئادهاوم بەڕێوەبەری گشتی تەندروستی جیهانی لە كۆنگرەیەكی رۆژنامەنووسیدا ئەمڕۆ رایگەیاند، دۆخی بڵاوبوونەوەی پەتاكە لە ئەمریكای لاتین باش نییە، بە تایبەت لەگەڵ بەرزبوونەوەی ژمارەی تووشبوان و گیان لەدەستدانەکان بە ڤایرۆسی كۆرۆنا .
ئاماژەی بەوەشكرد، دەركەوتنی نیشانەكانی پاشەكشەی كەمبوونەوەی ڕێژەی مردن لە جیهاندا، بە مانای ئەوە نییە سەركەوتوون بەسەر پەتاكەدا .
لە بەشێكی تری وتەكانیدا بەڕێوەبەری گشتی ڕێكخراوی تەندروستی جیهانی جەختیكردەوە، لە ئێستادا ئەوان توێژینەوە دەكەن لەسەر ئەگەری گواستنەوەی فایرۆسەكە لەڕێگەی هەواوە، لەو ڕوەوە رایگەیاند، ئەگەرەكان زیادبوون، بەڵام هێشتا نەگەیشتوونەتە بڕیاری كۆتایی .
ئەوەش لە كاتێكدایە هەفتەی رابردوو تەندروستی جیهانی رایگەیاند، بەم نزیكانە تیمێكی زانستی ڕەوانەی چین دەكەن بۆ لێكۆڵینەوە لە بنەماو سەرچاوەی ڤایرۆسەكە .
ئەمڕۆش كاریسا ئیتیان بەڕێوەبەری هەرێمایەتی ڕێكخراوی تەندروستی جیهانی رایگەیاند، ئەمریكای لاتین و ناوچەی دەریای كاریبی لە ئێستادا بوونەتە سەرچاوەی سەرەكی كۆرۆنا و لە 50%ی تووشوانی جیهان لەوێن، بەشێوەیەك ژمارەی تووشبوان بەردەوام لە زیادبووندایە .