وەزارەتی شارەوانی ئاماری پرۆژەكانی بڵاوكردەوە كە لە ساڵی رابردوو جێبەجێكراون و ئەو پڕۆژانەشی لە ئێستادا كاركردنیان تیایدا بەردەوامە و هاوكات ئاشكرای كرد 2 تریلۆن دینار تەرخان كراوە بۆ پڕۆژەكانی ساڵی داهاتوو.
وەزارەتی شارەوانی و گەشتوگوزاری هەرێمی كوردستان، ئەمڕۆ دووشەممە راپۆرتی كار و پڕۆژەكانی وەزارەتەكەی لەماوەی ساڵی رابردوو بڵاو كردەوە و ڕایگەیاند، 488 پڕۆژەی جیاواز جێبەجێ كراوە و زیاتر لە 251 ملیار دینار، تێچووی پڕۆژە تەواو كراوەكان بووە.
بەپێی راپۆرتەكەی وەزارەتی شارەوانی و گەشتوگوزار، ئەو پڕۆژانەی كاریان تێدا دەكرێت، بڕی 2 ترلیۆن دیناریان بۆ تەرخان كراوە.
وەزارەتەكە روونیكردووەتەوە ئەو پڕۆژانەی كە گوژمەیان بۆ تەرخانكراوە، بەڵام دەست بەجێبەجێكردنیان نەكراوە زیاتر لە 800 ملیار دیناریان بۆ تەرخانكراوە.
پرۆژە تەواوكراوەكان:
• 8 پڕۆژە لە سێكتەرەكانی شارەوانی و ئاو بە گوژمەی زیاتر لە 19 ملیار دینار.
• تەواوكردن و جێبەجێكردنی بەشی دووهەمی پڕۆژەكانی سلێمانی و هەڵەبجە بە دانان و گۆڕینی تۆڕی ئاو.
• جێبەجێكردنی پڕۆژەی ئاوی خواردنەوەی هەڵەبجە بە گوژمەی زیاتر لە 176 ملیۆن دۆلار لەلایەن ئاژانسی جایكای یابانی بەشێوەی قەرزی درێژخایەن.
• جێبەجێكردن و تەواوكردنی 252 پڕۆژە بە گوژمەی زیاتر لە 20 ملیار دینار لە سێكتەری شارەوانییەكان و لەسەر داهاتی فەرمانگەكان.
پڕِۆژە بەردەوامەكان:
• تەواوكردنی پڕۆژەی شەقامی 120 م خێرای نێوان رێگای سەرەكیی هەولێر و مووسڵ تا رێگای سەرەكیی هەولێر-كەركوك بە گوژمەی زیاتر لە 88 ملیۆن دۆلار.
• قۆناغی یەكەمی پرۆژەی دروستكردنی شەقامی 150 م خێرای نێوان رێگای سەرەكیی هەولێر-بەحركە تا رێگای سەرەكیی هەولێر- كۆیە بە گوژمەی زیاتر لە 140 ملیۆن دۆلار.
• دروستكردنی ئەندەرباسی فەرماندە و مزگەوتی ئیمام حمزە و قوتابخانەی سەفین لەسەر شەقامی بارزان و تەواوكردنی شەقامی كەمەربەند و پرۆژەی شەقامی خزمەتگوزاری بارزان بە گوژمەی نزیكی 69 ملیار دینار.
• جێبەجێكردنی پرۆژەی ئاوی بارزان و 51 گوندی دەوروبەری بە گوژمەی 130 ملیار دینار بەڕێژەی 31٪.
• پڕۆژەی جێبەجێكردن و چارەسەركردنی كێشەی كەمئاوی لە كەسنەزان و دەوروبەری بە گوژمەی 10 ملیۆن دۆلار بە ڕێژەی 60٪.
• جێبەجێكردنی پڕۆژەی ئاوی هەولێر (4) و چارەسەركردنی ئاوەڕۆی قورسی سلێمانی بە گوژمەی ملیارێك و 200 ملیۆن دۆلار بە رێژەی 7٪ بەشێوەی قەرز.
• جێبەجێكردنی پڕۆژەی ئاوی دەربەندیخان بە گوژمەی ٢٠ ملیۆن دۆلار بە رێژەی 60٪.
• جێبەجێكردنی پڕۆژەی ئاوی ئاكرێ بە گوژمەی 90 ملیار دینار بە ڕیژەی 59٪.
• (28) گرێبەستی تایبەت بە كۆكردنەوە و گواستنەوە و خاوێنكردن لە شار و شارۆچكە و گوندەكان لە سنووری شارەوانییەكان بە گوژمەی مانگانە نزیكی 12 ملیار دینار.
• دروستكردنی پڕۆژەی گەشتیاری لە دەروازەی كەلار – سلێمانی بە گوژمەی ملیارێك و 500 ملیۆن دینار.
• جێبەجێكردنی 5 پڕۆژەی ئاو بە گوژمەی 700 ملیۆن دینار كە بە رێژەی 7٪ جێبەجێ كراوە.
ئەو پڕۆژانەی دەخرێنە جێبەجێكردنەوە:
• تەرخانكردنی 400 ملیار دینار بۆ جێبەجێكردنی بەشێك لە شەقامی 100 مەتریی سلێمانی وەكو قۆناغی یەكەم.
• تەرخانكردنی زیاتر لە 11 ملیار و 500 ملیۆن دینار بۆ جێبەجێكردنی 155 پڕۆژە و پێداویستی لە بواری ئاو و ئاوەرۆ.
• تەرخانكردنی زیاتر لە 9 ملیار دینار بۆ جێبەجێكردنی 104 پرۆژەی بچووك و مامناوەند لە سێكتەری شارەوانی.
• دابینكردنی زیاتر لە10 ملیار دینار بۆ كڕینی مەوادی پاككەرەوە بۆ پڕۆژەكانی ئاو وە هەروەها دابەشكردنی ئاو بە پرۆسەی تەنكەرین.
• تەرخانكردنی زیاتر لە یەك ملیار دینار بۆ بەكرێگرتنی تەنكەر بۆ ئاوەدانی پارك و باخچە و بلوارەكان لە هەولێر و سلێمانی.
• تەواوكردنی قۆناغەكانی دیزاین بۆ جێبەجێكردنی پڕۆژەی چارەسەركردنی ئاوەڕۆی قورس لە شاری هەولێر (قۆناغی یەكەم) بە بڕی 300 ملیۆن دۆلار لەگەڵ دەستیشانكردنی كۆمپانیای راوێژكار.
• پرۆژەی دابینكردنی كەرەستەی یەدەگ بۆ پڕۆژەكانی ئاو لە پارێزگای هەولێر و راكێشانی هێڵی سەرەكی و ئاوەڕۆی لوولەیی و دابینكردنی كەرەستەی یەدەگ بۆ پرۆژەكانی ئاوی سلێمانی و هەڵەبجە بە گوژمەی 9 ملیۆن دۆلار.