قەوارەكەی قەیس خەزعەلی سەرۆكی گروپی عەسائیبی ئەهلی حەق لە پەرلەمانی عێراق رایكەیاند، سەرۆك وەزیرانی عێراق خیچ بژاردەیەكی بۆ گفتوگۆكردن لەگەڵ ئەمریكییەكان لەبەردەمدا نییە، جگە لە رازیبوون بە بڕیارەكەی پەرلەمان .
حەسەن سالح سەرۆكی قەوارەی سادیقون لە پەرلەمانی عێراق ڕایگەیاند، مستەفا كازمی تەنها یەك رٍێگەی لەبەردەمدا بۆ گفتوگۆكردن لەگەڵ ئەمریكییەكان، ئەویش جێبەجێكردنی بڕیاری پەرلەمانە بۆ دەركردنی هێزە بیانییەكان .
لەبەیاننامەیەكدا حەسەن سالم وتی " لە میانی سەردانەی بۆ ئەمریكا هیچ بژاردە و بڕیارێك لەبەردەمی كازمیدا نییە لە بابەتی دەركردنی هێزە بیانییەكان لە عێراق، بە تایبەت هێزەكانی ئەمریكا، بەڵكو دەبێت بڕیاری پەرلەمان جێبەجێ بكات، كە یاسای دەركردنی هێزە بیانییەكانی لە عێراق پەسەند كرد "
لە كۆتایی بەیاننامەكەدا سەرۆكی قەوارەی سادیقون جەختیكردووەتەوە، پێویستە لەسەر سەرۆك وەزیران لەچوارچێوەی ڕێككەوتندا سروشتی پەیوەندییەكان لەگەڵ ویلایەتە یەكگرتووەكانی ئەمریكادا دیاری بكات، بەشێوەیەك ڕێز لە سەروەریی عێراق بگرێت و دەستوەرنەدانە كاروباری ناوخۆیەوە .
ئەو وتانەی قەوارەكەی قەیس خەزعەلی لە كاتێكدایە، بریارە لە داهاتوویەكی نزیكدا مستەفا كازمی سەرۆك وەزیرانی عێراق سەردانی ویلایەتە یەكگرتووەكانی ئەمریكا بكات .
گروپی قەیس خەزعەلی یەكێكە لەو گروپانەی كە زۆر دژی مانەوەی هێزەكانی ئەمریكایە لە عێراق .