پۆلیسی هەولێر: دوو بەکارهێنەری ماددەی هۆشبەر دەستگیرکران

  2020-07-29  | 
 تۆڕی هەواڵی ژیان
ئەمڕۆ چوارشەممە، پۆلیسی پارێزگای هەولێر رایگەیاند، دوو بەکارهێنەری ماددەی هۆشبەر دەستگیرکراون، دەستیش بەسەر بڕێک لەماددەی هۆشبەردا لەجۆری کریستال گیراوە.

بەگوێرەی راگەیەندراوێکی پۆلیسی ھەولێر، بەشی پۆلیسی فریاکەوتنی ھەولێر، دوای کۆکردنەوە و بەدەستھێنانی زانیاری، لە گەڕەکی کارێزان و گەڕەگی ئیسکان، دو کەسیان بە ناوەکانی (ش.ع.ا) و (ھ.م.ع) بە تۆمەتی بەکارھێنانی ماددەی هۆشبەر لە جۆری (کریستاڵ) دەستگیر کرد.

هەر بەگوێرەی راگەیەندراوەکە، لە کاتی دەستگیرکردنی تۆمەتبارەکاندا، بڕێک ماددەی هۆشبەر و هەروەها کۆمەڵێک کەلوپەلی بەکارھێنانی ماددە ھۆشبەرەکانیان لابو.
ئەوەشخراوەتەڕو، تۆمەتبارانی ناوبراو، دانیان نا بە تاوانەکەیاندا، پەڕاوی لێکۆڵینەوەیان بۆ رێکخرا و بەپێی ماددە ١٤ی ھۆشبەرەکان لە یاسای سزادان، بەند کران و روبەڕوی یاسا کرانەوە.