بەڕێوەبەرایەتى پۆلیسى پارێزگاى هەولێر دەستگیرکردنى دووکەسى بە تۆمەتی لێدان لە منداڵێک بە ئۆتۆمبێل راگەیاند.
لە راگەیەندراوێکدا پۆلیسى هەولێر بڵاویکردەوە، بەشی پۆلیسی نەهێشتنی تاوان و بەشی پۆلیسی ناوشار/ ڕۆژهەڵات - بنکەی پۆلیسی باداوە، دوو تۆمەتباریان بە ناوەکانی (ا.ن.خ) و (ع.م.ا) و دانیشتووی گەڕەکی باداوە، بە تۆمەتی لێدان لە منداڵێک بە ئۆتۆمبێل دەستگیرکرد.
لە راگەیەندراوەکەدا هاتووە، ئەو منداڵەى لیدراوە ناوى (دواڕۆژ کارزان خەسرەو)ە، تەمەنى شەش ساڵە، بە ئۆتۆمبێلێکی جۆری (ئۆباما) لێیان دابوو و دواتر گوایە منداڵەکەیان بۆ نەخۆشخانە گواستووەتەوە، بەڵام لە شوێنێکی نزیک لە ڕووداوەکە فڕێیان دابوو.
بەپێى زانیاریەکانى راگەیەندراوەکە، تۆمەتبارەکان دانیان بە تاوانەکەیانداناوە، لەئێستاشدا بەپێی ماددەى 23ی هاتووچۆ بەند کران و ڕووبەڕووی یاسا کرانەوە.