یەكێك لەو تۆمەتبارانەی هێزە ئەمنیەكانی بەغدا كە سوكایەتی بە مێردمنداڵێك دەكەن، لەلایەن پۆلیسی سلێمانی دەستگیركرا و بڕیارە رەوانەی بەغدا بكرێتەوە.
ئاسۆ شێخ تەها، بەڕێوەبەری گشتی پۆلیسی سلێمانی، لە كۆنگرەیەكی رۆنامەوانیدا ڕایگەیاند: ئەو كەسانەی تۆمەتبارن بەو كارە لە ئێٍستادا زۆرینەیان دەستگیركراون، دوێنێش ئاگاداركراون كە گومان دەكەن یەكێك لەو تۆمەتبارانە بەرەو هەرێمی كوردستان هەڵهاتبێت .
وەزارەتی ناوخۆی عێراق عەمیدێكی وەك نوێنەر بە نوسراوی فەرمیەوە سەردانی سلێمانی كردووە، بەڕێوبەەری پۆلیسی سلێمانی، روونیكردەوە لە دوێنێوە دەستیان كردووە بە لێكۆڵینەوە ئەمڕۆش ئەو كەسە دەستگیركراوە، كە پلەی ریئیس عورەفایە و لە دەزگا ئەمنیەكانی بەغدا دەوام دەكات ماوەی سێ رۆژە هاتووەتە شاری سلێمانی.
بەڕێوەبەری پۆلیسی سلێمانی راشیگەیاند، دوای رێكخستنی پەڕاوی لێكۆڵینەوەكانی لێرە ئاراستەی بەغدا دەكرێتەوە لەبەر ئەوەی مەلەفی لێكۆڵینەوەكەی لەو شارەیە.