دەزگای ئاسایشی هەرێمی کوردستان ، زانیاری سەبارەت بە دەستگیرکردنی ژمارەیەک تیرۆریست بڵاودەکاتەوە.
دەزگای ئاسایشی هەرێم لە راگەیەندراوێکدا بڵاویکردەوە، دوای چاودێری و بەدواداچوونی ورد زانیاری و بەڵگەی دروست بەدەست هاتن و پاش رەزامەندی دادوەر، بە بڕیاری سەرۆکی دەزگای ئاسایشی هەرێم، هێزەکانی ئۆپراسیۆنی ئاسایشی سلێمانی بەهاوکاری بەڕێوبەرایەتی ئاسایشی رۆژئاوای سلێمانی هەڵمەتی دەستگیرکردنی تیرۆریستانیان لەسنوری چەمچەماڵ دەستپێکردووە و لەچەند ئۆپراسۆنێکدا رۆژی ٤ /٨ تیرۆریستانی تاوانبار (ج .م تەمەن ٢٦ ساڵ و تیرۆریست ئ .ه تەمەن ٣٠ ساڵ دەستگیرکران کە هەردووکیان خەڵکی فەلوجەن).
ئاماژە بەوەشکراوە، لەکاتی دەستگیرکردنی، تیرۆریست ( م.ه تەمەن ٢٩ ساڵ ) لەدەست ھێزەکانی ئاسایش ھەڵاتووە و دواتر بە برینداری دەستگیرکراوە، کە ساڵی ٢٠١٤ بەیعەتیان داوە بەداعش و چەکدار بوونە و بەشداربوونە لەچەندین تاوانی دەرحەق بە مرۆڤایەتی.
ئەوەشخراوەتەڕوو، هەر لەمیانی بەردەوامی لێکۆڵینەوەکان پەیوەست بەو دۆسێیە، هێزەکانی ئاسایش رۆژی ٥/ ٨ لە دوو ئۆپراسێۆنی جیاجیادا، سێ تیرۆستی تریان لەسنوری بەردەقارەمان و ناو شاری چەمچەماڵ دەستگیرکردووە کە پەیوەندیان بەهەمان گروپەوە هەبووە و هەریەک لە تاوانباران (ع . م) تەمەن٣١ ساڵ و (ع . ع) تەمەن ٢٢ ساڵ کە خەڵکی مەحمودییەن، دوای هەڵھاتنی دەستگیکراوە، هەمان ئێوارەش لەناو شاری چەمچەماڵ تیرۆریست (ع . د) تەمەن ٢٩ ساڵ خەڵکی بەغدا دەستگیراکراوە کە لێکۆڵینەوە لەگەڵیاندا بەردەوامە و رووبەرووی یاسا و دادگا کراونەتەوە.
هەر لە راگەیەندراوەکەی دەزگای ئاسایشی هەرێمدا هاتووە، بەپێی زانیارییە بەدەستهاتووەکان، تیرۆریستە دەستگیرکراوەکان لە خواروی عێراقەوە هەڵھاتوون و مەرامیان بووە لە سنوری چەمچەماڵ حەشارگەیەک دروستبکەن و رێگایەکی پەیوەندی دروستبکەن لەگەڵ چەند شانەیەکی نهێنی تیرۆرستانی داعش بۆ رێکخستنەوە و جێبەجێکردنی مەرامەکانیان بەڵام پێش دەستبەکاربوونیان پیلانەکەیان ئاشکراکراوە و دەستگیرکراون.
دەزگای ئاسایشی هەرێم راشیگەیاندووە، لەماوەی رابردوودا هێزەکانیان چەندین تیرۆریستی دیکەیان لەسنوری سلێمانی و گەرمیان و شاروشارۆچکەکانی هەرێم دەستگیرکردووە و لەبەر سەلامەتی لێکۆڵینەوە و ئارامی و ئاسایشی هاوڵاتیان زانیارییەکان پارێزراون و هێڵراونەتەوە و دۆسێکانیان لە لێکۆڵینەوەدان و لەداهاتوودا زانیاری وردیان لەبارەوە دەخرێتەڕوو.
جەختی لەوەشکردووەتەوە، تەواوی ھێزەکانیان شەونخونن بۆ پاراستنی ئۆقرەیی و سەروماڵی هاوڵاتیان و رووبەرووبوونەوەی هەر پیلانێک کە ژیان لە کۆمەڵانی خەڵک تێکبدات.