وتەبێژی بزووتنەوەی گۆڕان رایگەیاند، بەشێك لە بەرپرسان بەھاوكاری دامەزراوە ئەمنیەكان، سەرقاڵی قاچاخچێتی مەترسیدارن و بە ئاشكرا لە بازاڕدا نوسینگەی قاچاخیان داناوە داواش دەكەن هەرچی زووە كۆتایی بەو كارە بهێندرێت.
عەدنان عوسمان، وتەبێژی بزووتنەوەی گۆڕان، رایگەیاند: لەبری ھەنگاونانی خێرا بۆ چاكسازی و چارەسەری كێشەی موچە، قەبارەی گەندەڵی و قاچاخچێتی بە ئەندازەیەكی مەترسیدار زیادیكردووە.
ناوبراو لە راگەیەندراوێكی رۆژنامەوانیدا ئاماژەی بەوە كردووە بزووتنەكەیان لەو كارە نایاساییە بێ دەنگ نابێت و دەڵێت "بەشێك لە بەرپرسان بەھاوكاری دامەزراوە ئەمنیەكان، سەرقاڵی قاچاخچێتی مەترسیدارن و بە ئاشكرا لە بازاڕدا نوسینگەی قاچاخیان داناوەو ھەموو كاڵایەكی قەدەغەكراو بەبێ ھیچ پشكنینێك دەھێننە كوردستانەوە"
ئاماژەی بەوەشكردووە كە ئەو كارە مەترسیە لەسەر تەندروستی هاوڵاتیان و راشیگەیاند: پێویستە دەست بەجێ سەرۆكی حكومەت و جێگری سەرۆكی حكومەت بە ئەركی خۆیان هەستن بۆ كۆتایی هێنان بەم قاچاخچێتیە كە لە سنورەكاندا تەشەنەی كردوە.