ژمارەیەك لە مامۆستایانی خوێندنی كوردی لە شاری كەركوك خۆپیشاندانێكیان ئەنجامدا و تیایدا داوایانكرد راژەكانیان بگوازرێتەوە بۆسەر حكومەتی عێراقی.
دوای ئەوەی دوێنێ حكومەتی هەرێم بڕیاریدا موچە بەلێبڕینی 21% بۆ مانگی ئادار دابەش بكرێت، ناڕەزایی موچەخۆرانی لێكەوتەوە و بەشێك لە مامۆستایانی خوێندنی كوردی لە كەركوك كە راژەكانیان لەسەر هەرێمی كوردستان ئەمڕۆ خۆپیشاندانێكیان ئەنجامدا.
خۆپیشاندەرانی كەركوك داوایانكرد حكومەت راژەكانیان بگوازێتەوە بۆسەر بەغدا و چیتر پەیوەندیان بە هەرێمی كوردستانەوە نەبێت بۆ كاروباری ئیداری.
لەو خۆپیشاندانەدا خۆپیشاندەران پەیكەری مامۆستایەكیان وەك هێمایەك لەبێزاری مامۆستایانی خوێندنی كوردی لەئاست سیستمی موچەی حكومەتی هەرێم سوتاند.