دوابەدوای کوبوونەوەیان لەگەڵ شاندی عێراق بە سەرۆکایەتی مستەفا کازمی سەرۆک وەزیرانی ئەو وڵاتە لە واشنتن، مایک پۆمپیۆ وەزیری دەرەوەی ئەمریکا و فواد حسێن وەزیری دەرەوەی عێراق کۆنفڕانسێکی رۆژنامەوانی هاوبەشیان ئەنجامدا و لە کۆنفڕانسە رۆژنامەوانییەکەدا، پۆمپیۆ رایگەیاند، هیوادارین گەندەڵی لە عێراق بنەبڕ بکرێت و عێڕاقێکمان دەوێت گەندەڵی تیانەبێت.

ئاشکراشیکرد، داوایان لە حکومەتی عێراق کردووە کە بودجەی هەرێمی کوردستان بنێرێت.

وەزیری دەرەوەی ئەمریکا جەختی لەوەشکردەوە، بەردەام دەبن لە پشتیوانیکردنی عێراق بۆ بەرەنگاربوونەوەی داعش و گروپە تیرۆریستییەکان.

لایخۆشیەوە فواد حسێن وەزیری دەرەوەی عێراق سوپاسی بەرپرسانی ئەمریکای کرد، بۆ ئەو پێشوازییە گەرمەی کە لە شاندی عێراق کردوویانە.

راشیگەیاند، بەهەموو شێوەیەک هاوکاری و هەماهەنگی لەگەڵ واشنتن دەکەن بۆ بەرەنگاربوونەوەی تیرۆر.

فواد حسێن ئاماژە بەوەشکرد، کە لە میانی سەردانەکەیان بۆ ئەمریکا، چەند رێککەوتنێک لەبوارەکانی وزە و پیشەسازی لەگەڵ واشنتن ئیمزا دەکەن.

رۆژی سێشەممە ١٨ی ٨ی ٢٠٢٠، شاندێکی عێراق بە سەرۆکایەتی مستەفا کازمی سەرۆک وەزیرانی ئەو وڵاتە گەیشتە واشنتن و پێش سەردانەکەش، کازمی بە ئاژانسی ئەسیۆشیەتد پرێسی راگەیاندبوو، بۆ روبەڕوبوونەوەی مەترسییەكانی داعش، تاوەکو ئێستاش عێراق پێویستی بە یارمەتی ئەمەریكا هەیە.

ئاماژەی بەوەشکردبوو، هەمیشە پێویستیان بە هاوكاری و هەماهەنگی دەبێت، لە بەرەنگاربوونەوەی تیرۆر، ئەگەرچی بەشێوەی راستەوخۆی سەربازیش نەبێت، بەڵام لە رووی مەشق و راهێنان و ناردنی چەكەوە پێویستیان بە هاوكارییە.