کۆبوونەوەی دۆناڵد ترەمپ سەرۆکی ئەمریکا و مستەفا کازمی سەرۆک وەزیرانی عێراق لە واشنتن دەستیپێکرد و لە کۆبوونەوەکەشدا ترەمپ ئاماژەی بە رۆڵی کورد لە شەڕی دژ بە داعش کرد و رایگەیاند، کوردەکان دۆستێکی نزیکی ئێمەن و هاوکاری ئێمەیان کرد لە تێکشکاندنی داعش.
لە سەرەتای
کۆبوونەوەکەدا دۆناڵد ترەمپ سەرۆکی ئەمریکا بە رۆژنامەنوسانی راگەیاند، ژمارەی هێزەکانیان لە
عێراق کەمکردووەتەوە و ئەو ژمارەیەش کە ماونەتەوە، بۆ بەرپەرچدانەوەی هەڕەشەکانی
ئێران لە عێراقن.
ئاماژەی
بەوەشکرد، خۆشحاڵدەبن بەو کاتەی کە عێراق پێویستی بەوان نابێت و بە تەواوەتی
هێزەکانیان لە عێراق دەکشێننەوە.
وتیشی، لە
ئێستادا ژمارەیەکی کەم سەربازی ئەمریکا لە سوریا بوونیان هەیە و هەڵسەنگاندن بۆ
کشانەوەیان لە وڵاتە دەکەن.
سەرۆکی
ئەمریکا راشیگەیاند، کوردەکان دۆستێکی نزیکی ئێمەن و هاوکاری ئێمەیان کرد لە شەڕی
دژ بە داعشدا و تێکشکاندنی ئەو گروپە تیرۆریستییە.
ئەوەشی
خستەڕوو، لە کۆبوونەوەی لەگەڵ مستەفا کازمی پرسەکانی سەربازی و ئابوری تاوتوێ دەکەن.
لای خۆشیەوە،
مستەفا کازمی سەرۆک وەزیرانی عێراق سوپاسی بەرپرسانی ئەمریکای کرد، بۆ ئەو
پێشوازییە گەرمەی لێیانکردووە و رایگەیاند، واشنتن بەردەوام هاوکار و پشتیوانێکی
بەهێزی بەغدا بووە.
ئاماژەی
بەوەشکرد، ئەمریکا رۆڵێکی گرنگی هەبووە لە هاوکاریکردنی عێراق بۆ روبەڕوبوونەوەی
داعش و گروپە توندڕەوەکان.
لە بەشیکی
دیکەی قسەکانیدا سەرۆک وەزیرانی عێراق رایگەیاند، دەستوەردان و هێرشەکانی تورکیا بۆسەر
وڵاتەکەی مایەی قبوڵکردن نییە.
بەپێی هەواڵێك
كە ئاژانسی فەرمی هەواڵی عێراق بڵاویكردووەتەوە، مستەفا كازمی سەرۆك وەزیرانی عێراق
سەركەوتوو بووە لە سەركردایەتیكردنی دیالۆگی ستراتیژی نێوان عێراق و ئەمریكا لەبارەی
كشانەوەی هێزەكانی ئەمریكا لە عێراق.
هەر لەو
سەردانەدا، هەردوو لایەنی عێراق و ئەمریكا جەختیانكردووە لەسەر رێزگرتن لە سەروەری
خاكی عێراق و سەلامەتی خاكەكەی.
رۆژی
چوارشەممە ١٨ی٨ی٢٠٢٠، شاندێکی عێراق بە سەرۆکایەتی مستەفا کازمی سەرۆک وەزیرانی
وڵاتەکە گەیشتە واشنتنی پایتەختی ئەمریکا و ئەگەرچی بڕیاربوو ئەمڕۆ کۆتایی بە
سەردانەکە بێت، بەڵام بەهۆی کۆبوونەوەی دۆناڵد ترەمپ و مستەفا کازمی ماوەی
سەردانەکە بۆ سبەینێ درێژکرایەوە.