پارێزگاری دهۆک ڕایگەیاند ئەو کەسانەی دەستگیرکراون هەر کەسوکاری خۆیانن و بە بڕیاری دادوەرو یاسا بووە.
د.عەلی تەتەر پارێزگاری دهۆک بە(تۆڕی هەواڵی ژیان) ی ڕاگەیاند ئەو کەسانەی دەستگیرکراون بەهۆی ئەوەوەیە کە زیانیان بە موڵکی گشتی گەیاندوە یان کارمەندانی هێزە ئەمنیەکانیان بریندارکردوە.
لەبارەی ڕەوشی تەندروستی دەستگیرکراوەکانیشەوە، پارێزگاری دهۆک رەتیکردەوە هیچ کەسێک مانی لە خواردن گرتبێت و رەوشی تەندروستی خراپ بێت وخواردنیان پێ نەدرابێت.
وتیشی ئەوەی ژیانی لە مەترسیدایە ئەو پۆلیسەیە کە بە بلۆک لە سەری دراوە نەک دەستگیرکراوەکان.
د.عەلی تەتەر ئاماژەی بەوەشکرد ئێش و ئازاری خەڵک هی ئەوانیشە چونکە حکومەت لایەنێک نیە وخەڵکیش لایەنێک بێت بەڵکو هەموو لەیەک بەرەن.
وتیشی دادگا چی بڕیارێک لەسەر چارەنوسی ئەو کەسانە بدات ئەوان جێبەجێی دەکەن و رێزی لێ دەگرن.