بەهۆی گڕگرتنی بەلەمێکەوە چوار کۆچبەر گیانیان لەدەستدا

  2020-08-31  | 
لە ڕووداوێکی ئاگرکەوتنەوەدا چوار کۆچبەر گیانیان لەدەستدا
ئەرشیڤ
ئیتاڵیا
 تۆڕی هەواڵی ژیان
سەرۆکی دەزگای لوتکە بۆ کاروباری پەنابەران ڕایگەیاند، بەهۆی گڕگرتنی بەلەمێکی کۆچبەران لە نزیک سنورەکانی باشوری ئیتاڵیا، چوار کۆچبەر گیانیان لەدەستدا و پێنجی دیکەش برینداربوون.

ئاری جەلال سەرۆکی دەزگای لوتکە بۆ کاروباری پەنابەران ئاشکرایکرد، رۆژی یەکشەممە ٣٠ی٨ی٢٠٢٠، بەلەمێک کە هەڵگری ٢٠ کۆچبەر بووە، لە نزیک سنوری کالابریانی ئیتاڵیا ئاگریگرتووە و بەو هۆیەشەوە چوار کۆچبەر گیانیان لەدەستداوە و پێنجی دیکەش برینداربوون کە باری تەندروستی دوو کەسیان ناجێگیرە.

ئاماژەی بەوەشکردووە، رووداوەکە بەهۆی گڕگرتنی مەکینەی بەلەمەکەوە بووە.

ئەوەشی خستووتەڕوو، دوای بەدواداچونەکانی نوێنەرایەتی دەزگای لوتکە لە ئەوروپا و بەوتەی ڕزگاربووەکان،  بەلەمەکە هەڵگری کۆچبەرانی سریلانکا، میسر، سۆماڵ و پاکستان بووە.

سەرۆکی دەزگای لوتکە بۆ کاروباری پەنابەران راشیگەیاندووە، بەوتەی پۆلیسی ئیتاڵیا، ١٠ کەس لەڕزگاربووەکان مێردمنداڵ و خوار تەمەنی ١٨ ساڵ بوون.