تورکیا شەش گوندی لەسنوری زاخۆ بۆردومانکرد

  2020-09-16  | 
بۆردومانکردنی سنورەکانی هەرێم لەلایەن فڕۆکەکانی تورکیا
ئەرشیڤ
دهۆک
 مێهڤان مەجید
سوپای تورکیا بەردەوامە لە بۆردومانکردنی ناوچە سنوریەکانی پارێزگای دھۆک و هەر لەمڕۆشدا شەش گوند لە ھەردوو ناحیەکانی باتیفا و دەرکار لە قەزای زاخۆ بۆردومانکران .

قادر ئەحمەد لە ناحیەی دەرکار بە تۆڕی ھەواڵی ژیان-ی ڕاگەیاند، کاتژمێر 7:30 خولەکی ئەمشەو سوپای تورکیا بۆردومانی گوندەکانی شەرانشی سەروو و شەرانشی خواروو و شیشێ-ی لە سنوری ناحیەی دەرکار کردووە و تاوەکو  ئێستاش بۆردومانەکە بەردەوامە.

ئاماژەی بەوەشکرد، لەئێستادا فڕۆکەکانی تورکیا بەبەردەوامی لە ئاسمانی ناوچەکەدا دەسوڕێنەوە و جاربەجاریش بۆردوماندەکەن.

ھاوکات سەرچاوەیەک لە ناحیەی باتیفا بە تۆڕی ھەواڵی ژیان-ی ڕاگەیاند، لەبەیانی ئەمڕۆوە تاوەکو ئێوارە، فڕۆکە جەنگییەکانی تورکیا بۆردومانی گوندەکانی کەشان و ڕویسێ و بانک-یان کردووە.

ئەوەشی خستەڕوو، لە ئەنجامی ئەو بۆردومانە ئاگر لە چەند ناوچەیەک کەوتووەتەوە و زیانێکی زور بە زەوی و باخی ھاوڵاتیان گەیشتووە.

بەھوی بۆردومانەکانی سوپای تورکیا بۆ سەر بنکە و بارەگاکانی گەریلاکانی پارتی کرێکارانی کوردستان (پەکەکە) لە پارێزگای دھۆک، جگە لە شەهید و برینداربوونی ژمارەیەک هاوڵاتی مەدەنی، ھەزاران دۆنم زەوی و بێستانی ھاوڵاتیان سووتاون و بەرھەمەکانیان لەناوچوون.