کازمی: سورین لەسەر جێبەجێکردنی داخوازییەکانی خۆپیشاندەران

  2020-10-01  | 
 تۆڕی هەواڵی ژیان
مستەفا کازمی سەرۆک وەزیرانی عێراق لە ساڵیادی خۆپیشاندانەکەی ساڵی ڕابردووی عێراق بەیانامەیەکی بڵاوکردەوەو ڕایگەیاندوە سورن لەسەر جێبەجێکردنی داخوازییەکانی خۆپیشاندەران.

کازمی دەڵێت ئەم حکومەتە لەسەر نەخشە رێگای خۆپیشاندەران دروستبووە و ئێمەش بەوەفاین بۆ ماندووبون و قوربانیاندانی خۆپیشاندەران.

مستەفا کازمی ئاماژەی بەوەشکردوە لەگەڵ دەستبەکاربوونی ئێمە قەیرانی دارایی و ڤایرۆسی کۆرۆنا و دابەزینی نرخی نەوت رووی تێکردین و توشی کێشەی گەورەی کردین.

کازمی ڕاشیگەیاندوە ڕێز لە شەهید و بریندارەکانی خۆپێشاندانەکان دەگرین و بە یاسا قەرەبوویان دەکەینەوە.

سەرۆک وەزیرانی عێراق لە بەیانامەکەدا ڕایگەیاندوە وڵات بە دۆخێکی هەستیاردا تێدەپەڕێت و پێویستە سەرجەم گەلی عێراق و هێزە سیاسیەکان یەکگرتووبن لەبەرامبەر مەترسییەکان.

ئاماژەی بەوەشکردوە، دەبێت هەموان هەوڵبدەین عێراق بەرەو هەڵبژاردنێکی پێشوەختەی پاک و بێگەرد ببەین بە یاسایەکی دادپەروەر.

هەروەها دەشڵێت ڕووبەڕووی هەرکەسێک دەبنەوە کە دەستێوەردان لە کاروباری عێراق بکات و یاری بە چارەنوسی گەلەکەیەوە بکات.

ئەوە لەکاتێکدایە ئەمڕۆ ساڵێک بەسەر دەستپێکی خۆپیشاندانەکانی عێراقدا تێدەپەڕێت کە داوایانکرد حکومەت دەست لەکاربکێشێتەوە و هەڵبژاردنی پێشوەختە بکرێت،سەرئەنجام دوای دوو مانگ عادل عەبدولمەهدی سەرۆک وەزیرانی پێشووی عێراق دەستی لەکارکێشایەوە.