پەیوەندییە گشتییەكانی بڕیارگەی حەمزەی سوپای پاسداران رایگەیاند لە هەفاتەی رابردوودا دوو هێرشیان بۆ سەر گروپە چەكدارەكانی رۆژهەڵاتی كوردستان لە هەریەكە لە شارەكانی كامیاران و مەریوان ئەنجامداوە.
میدیاكانی حكومەتی ئێران لە زاری ئەو هێزەی ئێرانەوە راشیانگەیاند لە ئەنجامی ئەو شەڕانەیاندا لەگەڵ ئەو گروپە چەكدارانە سێ كەسیان "كوشتووە" و سێ كەسی دیكەش برینداربوون و كەسێكیش دەستگیركراوە.
ئەو ناوەندە سەربازیە هیچ ئاماژەیەكی بە زیانەكانی خۆی نەداوە لەو شەڕەدا بەڵام باسی لەوەكردووە كە ڕێژەیەكی زۆر چەك و تەقەمەنی دەستی بەسەردا گیراوە .
لێدوانەكە هیچ روونكردنەوەیەكی لەبارەی ناسنامەی ئەو گروپە چەكدارە نەداوە، بەڵام ئاماژەی بەوەكردووە ئەو كەسەی دەستگیركراوە خەڵكی ئێران نەبووە و كەسێكی بیانی بووە.