بەهۆی پشتیوانیكردن لە بەرهەمی ناوخۆیی و گەیشتنە ئاستی خۆبژێوی لەهەندێك بواردا، حكومەتی عێراقی چوار ملیۆن دۆلاری قازانج كردووە كە لە ناوخۆی وڵاتدا خەرجیكردووەتەوە.
حەمید نایف، وتەبێژی وەزارەتی كشتوكاڵی عێراق لە راگەیەنراوێكدا دەڵێت: لەرێگەی پشتیوانیكردن لەبەرهەمی ناوخۆیی وڵات لەبەرهەمهێنانی گەنم، جۆ و سەوزە و میوەدا ملیۆنان دۆلار داهات بۆ عێراق گەڕاوەتەوە و لەهاوردەكردنی كاڵای وڵاتانی دەرەوە خەرج نەكراوە.
ناوبراو ئەوەشی روونكردووەتەوە، وەزارەتی كشتوكاڵ پشت دەبەستێت بە رێكاری گونجاو بۆ پشتیوانیكردن لە بەرهەمی ناوخۆیی و كەمكردنەوە و رێگریكردن لە بەرهەمی هاوردە، ئەوەش بە ئامانجی هێشتنەوەی جێگری دراوی و دووبارە خەرجكردنەوەی لەناوخۆی وڵاتدا.
راشیگەیاند كە بەهۆی زیاد بوونی بەرهەمی كشتوكاڵی لە ناوخۆی وڵاتەكەدا رێژەی سەوزایش تا ئاستێك زیادی كردووە كە ئەوەش كاری گەری لەسەر ژینگەی وڵات دەبێت.