تەندروستی سلێمانی ئاماری ئەمڕۆی تووشبووانی کۆرۆنای بڵاوکردەوە و رایگەیاند، سێ تووشبووی دیکەی کۆرۆنا لە سلێمانی گیانیان لەدەستداوە .
یاد نەقشبەندی وتەبێژی بەڕێوەبەرایەتی گشتی تەندروستی سلێمانی رایگەیاند، ئەمڕۆ سێشەممە ٢٠ی١٠ی٢٠٢٠، ٤٢ تووشبووی کۆرۆنا داخلی نەخۆشخانەکانی تایبەت بە کۆرۆنا لە سلێمانی کراون و سێ کەسی دیکەش بە ڤایرۆسی کۆرۆنا گیانیان لەدەستداوە.
روونیشیکردووەتەوە، ئەمڕۆ لە هەرکام لە نەخۆشخانەکانی ئاسا، شەهید ئاسو و شەهید تاهیر تووشبوویەکی کۆرۆنا گیانی لەدەستداوە.
ئەوەش لە کاتێکدایە کە ماوەی چەند ڕۆژێک بوو ئاماری توشبوون و گیان لەدەستدان بە کۆرۆنا لە شاری سلێمانی رووی لە زیادبوون کردبوو و بەرپرسانی تەندروستی شارەکەش چەندین جار هۆشداریان دایە خەڵک و رایانگەیاند، گەر بەو شێوەیە بڕواتە پێش، لە چەند مانگی داهاتوودا هەموو بنەماڵەیەکی سلێمانی ئازاری کۆرۆنا دەچێژێت.
وتەبێژی بەڕێوەبەرایەتی گشتی تەندروستی سلێمانی راشیگەیاندووە، دڵنیابن بە پابەندبوونی ڕێنماییەکانی تاک پارێزی و جێبەجێکردنی ڕێنماییە پزیشکییەکان، دۆخەکە باشتر دەبێت.
بەپێی دواین ئاماری وەزارەتی تەندروستی حکومەتی هەرێمی کوردستان، لە سەرەتای سەرهەڵدانی ڤایرۆسی کۆرۆنای نوێ تاوەکو ئەمڕۆ، ٦٣ هەزار و ٧٤٥ کەس لە هەرێم تووشی کۆرۆنا بوون، لەو ژمارەیەش دوو هەزار و ٢١١ کەس گیانیان لەدەستداوە و ٣٨ هەزار و ١٨٦ تووشبووش چاکبوونەتەوە و پەتاکەیان تێپەڕاندووە .