سۆرانی  |  بادینی  |  English      

زڕنابێژی

جاسم محەمەد شرنەخی

نڤیسەر و ڕۆشنبیر
  03/03/2021  |    426 جار خوێندراوەتەوە

داخوزا لێبوورنێ ژسازبەندێن ڤى ئامیرێ مۆزیکیێ ڕەسەن دکم، بڕاستى ئەز بخوە پتر ژسازمۆرێن دیترین ڕۆژهەلات و ڕۆژئاڤا حەز ژزڕنایێ دکم، زڕنابێژێن پرۆفشناڵ ل دەڤ من جهێ ڕێزێنە، چونکى ئەوژى - مینا مە هەمیان نە کێمتر نە زێدەتر - بەندەیێن خوداینە هەر وەکى پێغەمبەرێ شرین سلاڤ لێ بن گۆتى: الناس سواسية كأسنان المشط...مرۆڤ مینا ددانێن شەهی وەکهەڤن"، مەرەما من ژتایتڵێ گۆتارێ زاڕاڤ و ئێدیەمەکە ژبۆ ئێشەکا جڤاکیا زۆر خراب و ترسناک ژئەنجامێ پەیڕەوکرنا سیاسەتەکا بەرۆڤاژ دهێتە گۆتن.

ئەو سیاسەتا دبیتن ڕێگر ل ئاڤادان و گەشەپێدانا هاوڵاتیان ل سەر بنەمایێن ڕەوشتیێن بلند وەکى: ڕاستى، دلسۆزى، گیانێ هاوڵاتیبوونێ...هند. "زڕنابێژى" ئانكو وێڤەتر ژ بێ دەنگى و بێ هەلویستیێ هەمبەر خەلەتى و خرابیێن خرابکاران ژ کارب دەست و سیاسیان، ئانکو پۆڵشکرنا ڕویێ کەسانێن خراب، جوانکرنا شاشى و خرابیان ژبۆ خوەشرینکرن و سالویسىیێ، مینا وێیا ئەڤرۆ ئەم ل بەرپەرێن تۆڕێن جڤاکى و ل سەر شاشەیێن دەزگەهێن ڕاگەهاندنێ دبینن ل سەمتا گەشبوونا هەر چرایەکێ ڕەخنەگرتنێ و هەڤدەم ل گەل هەر تبلدرێژکرنەکێ بۆ جهێ ئیش و برینان و لێگەڕیانێ ل چارەسەرکرنێ ژ لایێ ڕەوشەنبیر و هزرڤانانڤە بیت یانژى ژلایێ خەلکێ بیتن یێن دناڤ دەریا قەیران و مەرگەساتاندا خەندقین، دێ حەشامەتەکا پەیدابوویان ببینى هاتن ل سەر هێلێ و چ ب چڕا نەهێلان ژپاڕێزەرى و بەڕەڤانیکرنێ ژ سیاسەتمەدارێن فاشل و وان گەندەڵچیێن کورد و کوردستان کرینە سینەما بەلاش بۆ تەڤایا خەلکێ جیهانێ.

گەلۆ بۆچى؟، پاڵدەرێن ڤێ زڕنابێژیێ چنە؟! ل ڤێرێ هندەک ژ پاڵدەرێن ل پشت ڤێ دیاردەیا کومەڵایەتى تا رێژەیەکێ دیارن، ل پێشاهیا هەمیان دۆریاتیا سیاسى و جڤاکیە ژ لایێ مفادار و خامەفرۆشانڤە، پشتى نوخبەیا باڵادەست سیاسەتا: "هاوڵاتى برسى بکە دێ ل پەى تە هێت، ئەگەر نە دێ لەقا ل تەدت" ژ دەستپێکا ساڵێن حوکمڕانیا خوە و هەتا نهاژى بەردەوام پەیڕەوکرى، ئەڤ زڕنابێژێن نها وەکى وى سوپای  نە سەر دیار و نە دویماهى ژ بندیوارێن ژ بۆ کوڵەتیێ – وەکى دەنگ فرۆشى، وژدان فرۆشى، تا ب گەهیت ئاستێ ب کارئینانێ ژبۆ سختەکاریێ- ب نانێ حەرام تێر دکن، ئەڤ ئاوازێن نەشازێن ڤان زڕنابێژان مرۆڤ دزانت ژ کیژ قولاچا عویرێ وان دهێت نەکو ژدل و ژدانێن وان.

لێ هندەک ئەگەر و پاڵدەرێن دیترێن زڕنابێژى و مەللاقیێ زۆر ئاشکەرا نین وەکى یێن بوورین، بۆ نموونە: هندەک دەمان دێ بینى چەندین گەنج بوونە زڕنابێژ و یێن خوەشرین دکەن ب بەڕەڤانیکرنێ، هەمان زڕنا نەحەقێن گەندەڵچى لێ ددن، هەر وەکى کوراڵەکا تایبەت کا مایسترۆ و سترانبێژێ سەرکێشێ ئوپرایێ ب چ سەلیقەت سترانێ ئەدا دکن ئەوژى ب هەمان نۆتە ڤەدگێڕن!.

ب ڕاستى هەلویستێ زڕنابێژیێ دوویێ کوهپەقینتر و زکئێشتر و دلژانترە، چونکى یا چاڤەڕێى ژ گەنجێن مەیێن ئومیدا ڤى گەل وەڵاتى ب وانڤە هەلاویستى ئەوە بمینن دەستپاقژ و جان پاک و هۆشمەند، خوە شۆر نەکن ژبۆئاستێ نزمێ گەلەک کەسانێن ل ژیێ مە ب تەمەن، ئەو ژى خۆ دقڕێژا خرابکاریێ ڤە نەدەن و دەرۆنێ وان یێ پاراستى بت ژ کولەتى و دۆڕویاتى و گەندەڵیێ، نەمازە ئەو بخوە سەدجارى زڕبەهرتر و مەحرۆمترن ژ هەمى چینێن جڤاکى.

یا دیارە قەبارێ ستەما جڤاکى و سیاسى ل سەر گەنجان کا چەند مەزنە! لێ هەر چەوان بت چ زڕنابێژیا دویماهیێ بیتن یانژى یا ژبەرى وێ بیتن ڤەرێژا هەمان ژێدەرێ ئێشێن جڤاکیە، هەلبەت رەهـ و ڕیشاڵێن هەمى مەللاقى و کۆڵەتى و خوەشرینکرنەکا هەبیت ب پلەیا نایاب سیاسینە، واتە سیاسەتا فاشل و پاشڤەڕۆیە! ئەگەر ئەم مرۆڤ بین دونیا - ب هەمى گەنجینە و سامانێن خوەڤە - بەر وێ چەندێ ناکەڤیت کەڕامەتا خوداى ل مە بەخشى ب زڕنابێژیێ ئەم بەربازار بکین .


زێدەتر