سۆرانی  |  بادینی  |  English      

بازارەکێ ئازاد و وژدانەکا زیندانکری!

جاسم سەبری

نڤیسەر
  11/04/2021  |    1496 جار خوێندراوەتەوە

ئەو دەما روژێن دژوار ب سەر وەلاتێ چینێ دا دەرباز دبوون، "جاک مای" مەزنە بازرگانێ چینی، وەک ئەرکەکێ ئەخلاقی و نشتیمان پەروەری داشکاندنەکا ئێکجار مەزن دەینا سەر کرینا کەل و پەل و شمەک و کەرەستێن وەلاتێ خۆ، ئەڤێن دهێنە فرۆتن د مالپەرێ (عەلی بابا)دا، ژبوی هندێ وەلات و بازرگانیێن وەلاتێ وی زێدەتر توشی خۆسارەتیێ نەبن و هەر چنەبت کەل و پەلێن چینی برێکا رۆپەلا خۆ بفرۆشیت و بازارگەریێ بۆ پەیدابکەت، ژبەر وێ قەیرانا دژوارا وەلاتێ وی ژبەر ڤایرۆسێ کۆرۆنایێ تێدا دەربازدبوو .

رێژەکا باش ژ بازرگانێن مەژی لبەندا دەلیڤەکێ (قەیرانەکێ)دمینن، دا ئەرزاقی و کەلوپەلێن پێدڤی و رۆژانە برێکا سوشیال میدیایێ بکەنە خەلا و ب بوهایەکێ زێدە گران لسەر دەینن و مفایەکێ داڕایی یێ زێدە ژێ وەربگرن، ڤەدەر ژ هەمی پرەنسیپێن ئەخلاقی و مرۆڤایەتی و وەلاتپارێزی و نەتەوەیی ب فرۆشن .

بچویکترین نمونە ژی لڤێرێ پەیدابووی، بلندکرنا بهایێ بەردەڤکا (کەماما) و پێدڤیێن ساخلەمیێ بوو، لدەمێ ڕاگەهاندنا هەبوونا ڤایرۆسێ کۆرۆنایێ ل هەرێما کوردستانێ .

بێگومان ئەڤ چەندە ژی دچیتە د خانا گەندەلیا بازرگانی و خیانەتا نەتەوەیی دا، دەما رەوش بۆ بلندکرنا بهایێن کەلوپەل و ئاهێن خارنێ و پێتڤیێن رۆژانە دهێنە بکارئینان .

دنهاژی دا کو ئەم نێزیکی مەها رەمەزانێ بووینە و دڤێ مەهێ دا بازارێ کەلوپەل و ئاهێن خوارنێ گەرم دبیت و خەلک زێدەتری مەهێن دی ئاهێن خوارنێ دکریت، وەک دیاردا چەندین سالان ئەم دبینن ل گەلەک دوکان و جهێن بازرگانی لڤین کەتیە بهایێ کەلوپەلا و بشێوەیەکێ بەرچاڤ گران بووینە، لەوا فەرە حکومەت بشێوەیەکێ رژد لسەر ئەڤێ دیاردێ ڕاوەستیت و هەر بازرگانەکێ ئەڤێ مەهێ ب دەلیڤە بزانت بۆ گرانکرنا کەلوپەلان سزابدەت و چاڤدێریەکا توند ل بازاری بکەت بۆ هندێ بشێن بازارگەریەکا دروست و بازرگانیەکا ساخلەم پەیدا بکەت .

زێدەتر