سۆرانی  |  بادینی  |  English      

چەرخێ کوێلەبوونا تاکێ کورد!

جاسم سەبری

نڤیسەر
  04/03/2021  |    2356 جار خوێندراوەتەوە

ئێدی خەلک لڤی وەلاتی هند بێ  بها بوویە، هەر هێزەک و گرۆپەک و کەنالەک و بازرگانەک و حزبەکا بڤێت د خاپینیت و مزایدێ لسەر هەبوونا وان و ژیانا وان و ساخلەمی و ئاخ و ڕەنج و قوربانیدانا وان دکەت و وەک ئامرازەکێ بێ بها، بۆ بەرژەوەندیێن خۆ بکاردئینیت، ٣٠ سالە تاکێ کورد نەشیایە خۆ ژ بن‌ سانسورێن حزبی و عەشایری و عەقلێ گوندی و عاتیفێ دەرباز بکەت و هەست ب وان راستیان بکەت، ئەڤێن د رۆژەڤا کو ئەو تێدا رووددەن .

هەردەم تاکێ کورد پێدڤیە کەسەک یان کەنالەکێ حزبی یان سیاسیەک لێکدانێن بویەرێن دەرڤە و ناڤخۆ یێن نها و پاشەروژێ بۆ بکەت و جاڕەکێ بتنێ ژی ئامادە نەبوویە، بریارا خۆ یا سەربەخۆ بدەت بۆ هەر پرسەک و بابەتەکێ، تاکێ کورد هەردەم پێدڤی ب لایەنەکێ دی یە بویەران بۆ شرۆڤە بکەت، بێکو پشتگرێدانێ ب دیرۆک و عەقل و هزر و بیر و دیتنا خۆیا تایبەت بکەت .

لەورا ئەڤ چەندەیە وەدکەت، هەردەم خەلک قوربانیێن دەستێ دەستهەلاتەکا گەندەل و ئۆپۆزسیۆنەکا دوو رووی و ڕاگەهاندنەکا بێ وژدان و بازرگانیەکا مافیگەرایی بن و تانها مەزنترین ئارمانجێن خەلکێ، بتنێ دابینکرنا مافێن وان یێن سەرەتایی و پەیداکرنا نانێ رۆژێ بن، جهێ داخێ یە بهەمی رەنگان کار لسەر بێ بهابوونا مروڤان دهێتەکرن بهەمی رێکان ژوان ژی هێز و سامان و ترس و کەنال و ئامرازێن تایبەت یێن میدیایی و حزبی کو بکارێ ترساندن و  ڕەڤاندن و بسەردابرن و مژیلکرن و بێ بهاکرنا تاکەکەسان رادبن و ئەڤ چەندەیە وەکری تاکێ کورد د گۆرەپانا سیاسی و جڤاکی دا وەک کەسەکێ شکەستی لڤینێ بکەت و باوەری ب شیان و دیتن و هزر و بیرا خۆیا تایبەت نەمینت و ببیتە بەندەیێ سمینارەکا سیاسی یان گوتارەکا حزبی و ناچارببیت باوەر ژ  کەنالەکێ حزبیێ بەرژەوەندی خاز بکەت بۆ وی بویەران شروڤەبکەت، لەورا ئێدی فەرە ئەم تاکێن ڤی جڤاکی وەک ئەرکەکێ ئەخلاقی کار لسەر هندێ بکەن هۆشیارەکا جڤاکی و سیاسی و میدیایی پەیدا بکەن و ئاستێ هشیارکرنا تاکێ کورد بلند بکەین ژ پێخەمەت هندێ ئەم بشێن تاکەکێ ب باوەر و خۆدان سەنگ و دیتن و کەسایەتی ئاڤا بکەین.

زێدەتر