سۆرانی  |  بادینی  |  English      

دووباره‌ دادگه‌هكرنا پینج ژ ده‌سته‌سه‌ركریێن بادینان هاته‌ پاشداخستن

  2021-07-13  | 
 تۆڕا نووچەیا ژیان
ئه‌ڤرۆ بۆ جارا دووێ دادگه‌هكرنا پێنج ژ چالاكڤانێن بادینان ل دادگه‌ها كه‌تنا دوویا هه‌ولێرێ بۆ 20ی 9ی 2021ێ هاته‌ پاشداخستن، ئێك ژ پارێزه‌رێن وان ژی دبێژت، ئه‌ڤ پاشداخستنه‌ بخۆ سزایه‌ بسه‌ر واندا دهێته‌ سه‌پاند.

هه‌رێم ره‌فعه‌ت عه‌بدولا، ئێك ژ پارێزه‌رێن ده‌سته‌سه‌ركریێن بادینان دكۆنگره‌یه‌كێ رۆژنامه‌ڤانیدا ڕاگه‌هاند، "ئه‌ڤرۆ دادگه‌ها كه‌تنا دوویا هه‌ولێرێ دووباره‌ دادگه‌هكرنا پێنج ژ ده‌سته‌سه‌ركریێن بادینان پاشداخست بۆ 20ی 9ی 2021ێ.

ئاماژه‌ ب وێیه‌كێ ژی كر، "ئه‌ز نزانم بوچی دادگه‌هێ بڕیارا پاشداخستنێ ده‌رخست، د ده‌مه‌كی دا دانپێدانێن توهمه‌تباران و شاهدحالان وه‌رگرتنه‌، نزانین بۆچی بۆ ڤه‌گوهاستنا تومارێ و خواندنا له‌وحا پارێزه‌ران و سه‌رۆكێ دادگه‌هێ بڕیارا پاشداخستنێ هاته‌ دان".

گوت ژی، "ئێك ژ تاوانێن وان ده‌سته‌سه‌ركریان ئه‌وبوو كو هزر د دروستكرنا پرۆژه‌یه‌كی دادكرن بۆ وێیه‌كێ ئه‌و ژنێن ئێزدی یێن ژ ده‌ستێ داعشێ رزگاربووین ڤه‌گه‌ریننه‌ دناڤ ژیانا جڤاكی دا و د ئه‌سلدا ئه‌ڤه‌ خزمه‌ته‌".

به‌حسا وێیه‌كێ ژی كر، "چ تومه‌ت لسه‌ر هه‌ر پێنج ده‌سته‌سه‌ركریان ساخ نه‌بووینه‌ و ب پشتراستی ڤه‌ دێ هێنه‌ ئازادركن".

ئه‌ڤه‌ د ده‌مه‌كی دایه‌، رۆژا 5ی ڤێ مه‌هێ دادگه‌هكرنا نه‌هـ رۆژنامه‌ڤان و چالاكڤانێن ده‌سته‌سه‌ركریێن دی یێن بادینان هاتبوو پاشداخستن و سه‌ده‌م ژی بۆ وێیه‌كێ ڤه‌گه‌راندن كو ئێك ژ دادوه‌ران مووله‌ت وێ رۆژێ وه‌رگرتبوو ".

هه‌ڤده‌م، ل گۆره‌ی مادده‌یێ (1) ژ یاسایا 21ێ یا سالا 2003ێ یا په‌رله‌مانێ كوردستانێ كو بسه‌ده‌ما سیخوری و تێكدانا ئاسایشا هه‌رێمێ ئه‌و چالاكڤان و رۆژنامه‌ڤانێن هاتینه‌ ده‌سته‌سه‌ركرن دێ هێنه‌ دادگه‌هكرن.