سۆرانی  |  بادینی  |  English      

لیژنەیا ئاسایش و بەڕەڤانیێ: ئەمریکا ڕازی بوویە هێزێن خۆ ل عێراقێ ڤەکێشیت

  2021-04-14  | 
 تۆڕا نووچەیا ژیان
لیژنەیا ئاسایش و بەڕەڤانیێ ل پەرلەمانێ عێراقێ ئاشکراکر، هاتنە ئاگەهدارکرن لسەر وێ چەندێ کو واشنتۆن ڕازی بوویە لسەر ڤەکێشانا هێزێن سەربازی ل عێراقێ.

بەدر زەیادی ئەندامێ لیژنەیێ د داخویانیەکا تەلەفزیۆنی دا ڕاگەهاندیە، کو لیژنەیێن هەڤبەشێن د ناڤبەرا عێراق و ویلایەتێن هەڤگرتیێن ئەمریکا دا تایبەت ب گۆتۆبێژێن ستراتیژی، ئاگەهدار کرینە کو ئەمریکا رازیبوون نیشاندایە لسەر ڤەکێشانا هێزێن شەرکەرێن خۆ د ناڤخۆیا عێراقێ دا.

دیارکریە ژی، ڕازیبوونا ئەمریکا ب وێ لەزاتیێ لیژنە تووشی مەندەهۆشیێ کریە و ئەڤە ژی کارەکێ گەلەک باشە.

هەروەسا دایەزانین، کو کاراکرنا لهەڤهاتنا د ناڤبەرا بەغدا و واشنتۆن کارەکێ گرنگە بۆ بهێزکرنا پەیوەندیێن ناڤبەرا هەردوو ئالیان دا، ژبەرکو لگۆری لهەڤهاتنا داویێ ئەو هێزێن ل عێراقێ دمینن بۆ ڕاهێنانانە نەک هێزا شەرکەر و سەربازی.

رۆژا ٨ێ ڤێ مەهێ د کڤانێ گۆتۆبێژێن ستراتیژی دا کو ل سالا ٢٠٠٨ ڤەیە د ناڤبەرا ئەمریکا و عێراقێ دا هاتیە ئیمزاکرن، فوئاد حسێن وەزیرێ دەرڤەیێ عێراق و ئەنتۆنی بلینکن وەزیرێ دەرڤەیێ ئەمریکا، ب ڤیدیۆ چات سەرپەرشتیا جڤینێ کرن.