سۆرانی  |  بادینی  |  English      

لسەر پولەیێ پاپای ئیران ژی هاتە دەنگ

  2021-03-10  | 
 تۆڕا نووچەیا ژیان
پشتی تورکیا، ئیران ژی لسەر چاپکرنا پولەیێ پاپای هاتە دەنگ.

میدیایێن ئیرانێ بەلاڤکرن، "چاپکرنا پولەکێ ژ ئالیێ هەرێما کوردستانێ کو تێدا بەشەک ژ ئاخا ئیرانێ وەک دەڤەرەکا هەرێمێ دیارکریە، کارڤەدانا وەزارەتا دەرڤەییا ئیرانێ لێکەفت".

سەعید خەتیب زادە پەیڤدارێ وەزارەتا دەرڤەیا ئیرانێ بۆ ڕۆژنامەڤانان ڕاگەهاندیە، یا زەلال و ئاشکرایە ئەوا کو بەلاڤبووی، بەرڤاژی پرەنسیپ و یاسایێن ناڤدەولەتییە.

دایەزانین ژی، کۆمارا ئیسلامیا ئیرانێ نەڕازیەتیا خۆ دەربارەی وێ یەکێ گەهاندیە حکومەتا عێراقێ و داخازکریە هەموو ئەو پولەیێن کو هاتنە چاپکرن کۆم بکەت و بڕیارا خۆ ڕاستڤەکەن.

ئەڤ داخویانیێن پەیڤدارێ وەزارەتا دەرڤەیا ئیرانێ پشتی وێ یەکێ دهێت کو دەنگۆیێ وێ یەکێ هاتبوو بەلاڤکرن کو پاپا فرانسیس، مەرجەعێ بلندێ مەسیحیێن کاسۆلیکێن جیهانێ گەهشتە عێراقێ و دیڤدا هاتە هەولێرێ، ل هەرێما کوردستانێ شەش جۆرێن پولەیان هاتنە دروستکرن کو ڕاڤەیا سەرەدانا پاپای بۆ هەرێما کوردستانێ دکر.

ئێک ژ وان پولەیان ژی هەبوونا نەخشێ کوردستانا مەزن بوو تێدا و ڤێ یەکێ ژی نەڕازیبوونا تورکیا لپەی بوو.