سۆرانی  |  بادینی  |  English      

دهۆك.. د سێ بوویه‌رێن هاتن و چوونێدا نه‌هـ كه‌س برینداربوون

  2021-07-13  | 
 ڕژیار ڕەشید
سپێده‌هیا ئه‌ڤرۆ ل سنورێ پارێزگه‌ها دهۆكێ سێ بوویه‌رێن هاتن و چوونێ ژ جورێ لێكدان دناڤبه‌را نه‌هـ ترۆمبێلاندا روویدان و دئه‌نجامدا نه‌هـ كه‌س برینداربوون .

ئازاد تاها رێڤه‌به‌رێ ڕاگه‌هاندنا هاتن و چوونا پارێزگه‌ها دهۆكێ ڕاگه‌هاند، ئه‌ڤرۆ ده‌مژمێر 9:30ی سپێدێ لنێزیك پرا حسێنیێ ل سنورێ ناحیا روڤیان بوویه‌ره‌كا هاتن و چوونێ ژ جورێ لێكدان دناڤبه‌را چار ترۆمبێلاندا روویدا و كه‌سه‌ك تێدا برینداربوو .

هه‌ڤده‌م، حازم محه‌مه‌د به‌رپرسێ ڕاگه‌هاندنا هاتن و چوونا قه‌زا به‌رده‌ره‌ش ژی بۆ تۆڕا نووچه‌یی یا ژیان ڕاگه‌هاند، ل ده‌مژمێر 11:00ی به‌ری نیڤرۆیا ئه‌ڤرۆ ل چواریانا روڤیا بوویه‌ره‌كا هاتن و چوونێ ژجورێ لێكدان دناڤبه‌را دوو ترۆمبێلاندا روویدا و دوو كه‌س تێدا برینداربوون .

هه‌روه‌سا ڕاگه‌هاندنا هاتن و چوونا قه‌زا ئامێدیێ ژی د ئه‌هه‌مان ده‌مدا ڕاگه‌هاند، لسه‌ر جاددا سه‌ره‌كیا سه‌رسنكێ لنێزیك گوندێ سیدئاڤا بوویه‌ره‌كا هاتن و چوونێ دناڤبه‌را سێ ترۆمبێلاندا روویدا و د ئه‌نجامدا شه‌ش كه‌س برینداربوون و ژبووی نه‌خوشخانا ته‌نگاڤیان ل دهۆكێ هاتینه‌ ڤه‌گوهاستن.

به‌حسا وێیه‌كێ ژی كر، د هه‌ر سێ بوویه‌راندا زیانێن ماددی یێن مه‌زن گه‌هشتنه‌ هه‌ر نه‌هـ ترۆمبێلان.

ئه‌ڤه‌ د ده‌مه‌كی دایه‌، ژ ده‌ستپێكا ئه‌ڤ ساله‌ و هه‌یا نها زێده‌ترین بوویه‌رێن هاتن و چوونێ ل سنورێ پارێزگه‌ها دهۆكێ بگشتی و ل سنورێ قه‌زا به‌رده‌ڕه‌ش و جاددا سه‌رسنكێ ل قه‌زا ئامێدیێ ب تایبه‌تی هاتنه‌ توماركرن، پۆلیسێن هاتن و چوونێ سه‌ده‌مان بۆ پێگرنه‌بوونا شۆفێران ڤه‌دگه‌رینن و شۆفێر سه‌ده‌مان بۆ خرابیا جاددێ ڤه‌دگه‌رینن.

May be an image of outdoors
May be an image of 1 person, car and outdoors
May be an image of outdoors
No description available.
No description available.
No description available.