سۆرانی  |  بادینی  |  English      

"هەرێم دکاریت هەمی مەهان بێ لێبڕین مووچەی پارڤەبکەت"

  2021-03-13  | 
 تۆڕا نووچەیا ژیان
ئەندامەکێ لژنە دارایا پەرلەمانێ کوردستانێ ڕاگەهاند، حکومەتا هەرێمێ دکاریت بێ لێبڕین مووچەی پارڤەبکەتن، لێ هەیا نها دەربارەی بلندبوونا دهاتان چ زانیاری نەدانەمە.

شێرکۆ جەودەت، ئەندامێ لژنەیا دارایا پەرلەمانێ کوردستانێ بۆ تۆڕا نووچەییا ژیان ڕاگەهاند، حکومەتێ چ زانیاری نەدانەمە پشتی بلندبوونا بهایێ نەفتێ نها داهاتێ مەهانەیێ هەرێمێ چەندە.

هەرچەندە بهایێ نەفتێ د نهادا ل بازارێن جیهانێ د ئاستەکێ بلندایە، لێ حکومەتا هەرێمێ لسەر لێبڕینا مووچەی بەدەوامە، وی ئەندامێ لژنەیا دارای گوت ژی، حکومەت دکاریت بێی لێبڕین مووچەی پارڤەبکەتن، لێ ژبەر گەندەلی و نەدادی بێی لێبڕین پارڤەناکەت.

د دەما دەربازبووی دا بەنکا ناڤەندیا عێراقێ بریاردا بهایێ دۆلاری لهەمبەر دینارێ عێراقێ نێزیکی 20% بلند بکەت بۆ وێیەکێ بکاریت کورتئانینێ د بودجەی دا کێمبکەت، وێ یەکێ ژی رێک خۆشکرنەکا مەزن کر بۆ حکومەتا هەرێمێ هەیا بکاریت داهاتێ نەفتێ کو ب دۆلاریە د پارڤەکرنا مووچەیێ فەرمانبەران دا بکاربینت.

بەهرۆز جەعفەر، شارەزایێ بوارێ وزێ د وێ دەربارێ دا بۆ تۆڕا نووچەییا ژیان ڕاگەهاند، هەرێما کوردستانێ دکاریت مووچەی بێ لێبڕین پارڤەبکەت، ژبەرکو بهایێ نەفت و دۆلاری بلندبوویە.

حکومەتا هەرێمێ سالا دەربازبووی، مووچەیێ مەها سباتێ ب لێبڕینا 21%ێ ڤە پارڤەکر، بەریا وێ ژی حکومەت و بەشەک ژ حزبان تەکەز ل وێیەکێ کربوو کو لێبڕین بۆ ئێک مەهێ یە، لێ زێدەباری بلندبوونا بهایێ نەفتێ و بهایێ دۆلاری، زێدەتر ژ سالەکێ یە مووچە ب لێبڕین ڤە دهێتە پارڤەکرن و حکومەت نەیا حازرە لێبڕینێ ب داوی بینیت.

ئەڤە د دەمەکێ دایە، دوهی جەمال کۆچەر ئەندامێ لژا دارایا پەرلەمانێ عێراقێ ڕاگەهاندبوو، هەر دەما نەفت بگەهیتە ٧٠ دۆلاران وی دەمی هەرێمێ چ پێتڤی ب بەغدا نامینیت، ئانکو ل گۆرەی داتایێن حکومەتا هەرێمێ، نها ئەم گەهشتنە وی ئاستێ کو مە پێتڤی ب بەغدا نەبیت.