سۆرانی  |  بادینی  |  English      

لژنا پێشمه‌رگه‌ی داخازا ده‌ملده‌ستا پارڤه‌كرنا موچه‌یێ لێوایێن هه‌ڤبه‌ش دكه‌ت

  2021-03-28  | 
 تۆڕا نووچەیا ژیان
لژنا کاروبارێن پێشمەرگە ل پەرلەمانێ کوردستانێ ڕاگەهاند، زێدەتر ژ دوو مەهایە موچەیێ لیوایێن هەڤبەشێن پێشمەرگە نەهاتینە پارڤه‌كرن، هەر ژبەر هندێ داخازێ ژ ئالیێن پەیوەندیدار دکەت بلەز بهێنە سەر خەت بۆ چارەسەرکرنا وێ ئاریشه‌یێ.

لژنا کاروبارێن پێشمەرگە ل ڕاگەهاندنەکێدا بەحس ژ وێیەکێ کریە، پشتی نە هنارتنا موچەیێ لیوایێن هەڤبەش ژ ئالیێ ئەمریکیان ژ ئەگەرێ ئاریشه‌یه‌كا تەکنیکی، دەما پارڤه‌كرنێ پاشخستیە و زێدەتر ژ دوو مەهانە لیوایێن هەڤبەش موچە بۆ نەهاتیە خەرجکرن .

هەروەسا دبێژیت، بۆ ڤێ مەبەستێ ل 15ی ڤێ مەهێ دا لژنا کاروبارێن پێشمەرگە ب نڤیسارا فەرمی وەک پێشنیار داخاز ژ ئالیێن پەیوەندیدار کریە تا هاتنا موچێ ئەمریکیان، ب میکانیزما گونجاو بزاڤێ بکەن پارەی بۆ وەزارەتا پێشمەرگە بهێتە دابینکرن هه‌یا موچە بهێتە پارڤه‌كرن بسەر وان هێزان دا.

ئاماژە ب وێیەکێ ژی کریە، دابینکرنا ژیانا ڤان هێزان گرێدایە ب موچەی ڤە و ل گورەی دیڤچوونان ژیانا زۆربەیا وان ژ روویێ ئابوری بزەحمەت کەتیە، ژبەر هندێ پێتڤیە هەمی مەهان دگەل فەرمانبەرێن حکومەتێ موچە وەربگرن.

ئەو لژنا پەرلەمانی زێدەتر گوتیە، ''لڤێرێ هەمی ئالیەکێ ئاگەهدار دکەین کو لژنا کاروبارێن پێشمەرگە ل بزاڤێن خۆ یا بەردەوامە دگەل ئالیێن پەیوەندیدار کو بلەز بهێنە سەر خەت بۆ چارەسەرکرنا ڤێ ئاریشێ ''.

هەمی مەها، ئەمریکا زێدەتر ژ 20 ملیۆن دۆلار بۆ هاریکاریا پێشمەرگە دێ هنێریت و موچەیێ لیوایێن هەڤبەش ددەت، لێ ژ ئەگەرێ وێ ئاریشا هونەری نێزیکی دوو مەهانە بۆ نە هاتیە خەرجکرن .

وەزارەتا پێشمەرگە 21ێ مەها دەربازبوویدا ڕاگەهاند، لیوایێن هەڤبەشێن وەزارەتێ، بۆ وێ مەهێ سێ موچە پێکڤە و بێی لێبرین وەردگرن. ڕاگەهاند ژی، ئاریشا موچەیێ لیوایێن 12 یا پیادە چارەسەرکریە و ل وێ مەهێ بێی لێبرین موچەی وەردگرن.