سۆرانی  |  بادینی  |  English      

هێزێن ڕزگاریا عەفرینێ ئامارا ٢٠ ڕۆژێن دەربازبوویی یا چالاکیێن خۆ بەلاڤکر

  2021-04-09  | 
 تۆڕا نووچەیا ژیان
هێزێن ڕزگاریا عەفرینێ ڕاگەهاند، هێزێن وان ل دەڤەرێن جودایێن باژاڕێ عەفرینێ د ناڤبەرا ٢٠ ڕۆژان دا چەندین چالاکی ئەنجامدانە و تێدا 14 سەربازێن تورکیا و چەکدارێن گرۆپێن توندڕەو هاتنە کوشتن و ١٢ێن دی ژی برینداربوونە .

هێزێن ڕزگاریا عەفرینێ کو ب بەشەک ژ یەکینەیێن پاراستنا گەل (یەپەگە) دهێنە دانان د ڕاگەهاندنەکێ دا دازانین، ڕۆژا 19ێ ئادارێ هێزێن وان ل تاخێ زەیدیا باژاڕێ عەفرینێ چالاکیەک ئەنجامدا و تێدا دوو چەکدار هاتنە کوشتن و ئێکێ دی ژی برینداربوو و ڕۆژەکێ دیڤدا و ل ٢٠ێ مەهێ تڕۆمبێلەکا گروپێن چەکدارێ تێکشکاندیە .

دیارکر ژی، د چالاکیەکا دی دا ل ڕۆژا ٢٤ێ هەمان مەهێ ل گوندێ قزلباشایێ گرێدایی بلبلێ هێزێن وان تڕۆمبێلەک کرە ئارمانج و تێدا کەسەک برینداربوویە .

هەر د ڕاگەهاندنا هێزێن ڕزگاریا عەفرینێ دا هاتیە، ڕۆژا 28ێ ئادارێ د ئەنجاما چالاکیەکێ دا ل باژارۆکێ مارێ لهەمبەر بارەگەهەکێ سوپایێ تورکیا چار سەرباز ھاتن کوشتن، دوویێن دی ژی برینداربوون، ھەروەسا دوو خالێن سەربازان هاتن تێکبرن و ل هەمان ڕۆژ د چالاکیەکا دی دا ل سنورێ باژاڕێ جندرێسێ چەکدارەکێ دی هاتە کوشتن .

بەحسا وێیەکێ ژی کریە، کو ل ڕۆژا ٧ێ نیسانێ هێزێن وان دوو چالاکیێن جودا ل باژارۆکێ مارێ و گوندێ گۆبەلێیێ ئەنجامدان و تێدا پێنج سەربازێن ئارتێشا تورکیا هاتنە کوشتن و هەشتێن دی ژی برینداربوون .

رۆژا ١٨ێ ئادارا ٢٠١٨ێ دەولەتا تورکیا و گرۆپێن چەکدارێن گرێدایی وێ یێن بناڤێ ئۆپۆزسیۆنا سوریا دەست ب سەر باژارێ عەفرینا رۆژئاڤایێ کوردستانێ دا گرتن. ژ وی دەمی ڤە هەیا نها هێزەک ژ شەرڤان و خەلکێ عەفرینێ دبن ناڤێ هێزێن رزگاریا عەفرینێ هاتیە پێکئینان، ناڤ بناڤ چالاکیان ل دژی هێزێن چەکدارێن ناڤ وی باژاری پێکدئینن .