لە لێدوانێکی تایبەتدا بۆ تۆڕی هەواڵی ژیان، حەسەن نازم وتەبێژی حکومەتی عێراق رایگەیاند، ئەمڕۆ لە پەرلەمانی عێراق چەندین کۆبوونەوەمان لەگەڵ فراکسیۆنەکانی پەرلەمان ئەنجامدا و کۆتایەکەشی لە گەڵ فراکسیۆنە کوردستانییەکان بوو، بە تایبەتی فراکسیۆنی یەکێتی.

وتیشی، "ئەو بابەتەی باسمانکرد پڕۆژە یاسای جەژنی نیشتمانی و ڕۆژانی پشوو بوو، ئەم دوو پڕۆژە یاسایە دەمێکە لە حکومەت و پەرلەمان باسی لێدەکەین، بە بۆچوونی من یاسای جەژنی نیشتمانی خوێندنەوەی دوومی بۆ دەکرێت، ئومێدەواریشم تێبپەڕێت، ئەمڕۆش باسی ڕۆژانی پشوومان کرد، وەك دەستپێشخەریەك ئێمە کار لەسەرئەوە دەکەین کە گشت چین و توێژەکانی عێراق بە گشت ئایین و نەتەوەکانیان جەژنی تایبەتی خۆیان هەبێت و دەبێت هەموو نەتەوەکانی عێراقی ڕێزی تایبەتی خۆیان هەبێت".

سەبارەت بە كێشەی بودجەی نێوان بەغدا و هەرێمی کوردستان، وتەبێژی حکومەتی عێراق رایگەیاند، "چەندینجار باسی ئەم بابەتەم کردووە، ئێستا بودجە لە خاڵە کۆتایەکانیەتی بۆ دیاریکردنی پشکی کورد و شاندی هەرێمی کوردستان لە بەغدا بوون و سەردانێکی تریشیان ماوە بۆ یەكلایکردنەوەی هەموو کێشەکان، بە بڕوای من بەم نزیکانە دەگەینە چارەسەرکردنی کێشەکانی نێوانمان . "

دەربارەی ئەنجامی بەدواداچوون و لێکۆڵینەوە لە هێرشەکەی هەفتەی رابردوو بۆ سەر شاری هەولێر، حەسەن نازم رایگەیاند، "بابەتەکە هەر فڕۆکەخانەی هەولێر نیە، بەڵکو بۆردومانکردن و هەڕەشەکان بەردەوام ڕوبەڕووی وڵاتەکەمان دەبێتەوە، ئەم هێرشانەی کە لە ناسڕیە و هەولێر ڕوویانداوە، ئێمە ئیدانەی دەکەین و سەرۆك وەزیران سەرپەرشتی ئەم لیژنانە دەکات بۆ دیاریکردنی تاوانبارەکان".

لە وەڵامی پرسیارێکی تۆڕی هەواڵی ژیان سەبارەت بەوەی کە، کاری هاوبەشی هێزەکانی پێشمەرگە و هێزەکانی سوپای عێراق لە ناوچەکانی مادەی 140 دەستوری عێراقی بەچی گەیشتووە و هێزەکانی پێشمەرگە دەگەڕێنەوە؟، حەسەن نازم وتەبێژی حکومەتی عێراق وتی، "ببورە با ئەم پرسیارە تەرك بێت بۆ من" .

بۆ گفتوگۆکردن دەربارەی پڕۆژە یاسای بودجەی فیدڕاڵی عێراق بۆ ساڵی ٢٠٢١ و جێگیرکردنی پشکی هەرێم لە بودجەکەدا، تاوەکو ئێستا شاندی دانوستانکاری هەرێمی کوردستان  چەندین جار لەگەڵ لایەنە سیاسییەکان و بەرپرسانی عێراق کۆبووەتەوە و رۆژی رابردووش، بۆ ئەو مەبەستە و جارێکی دیکە شاندی دانوستانکاری هەرێم بەسەرۆکایەتی قوباد تاڵەبانی جێگیری سەرۆکی ئەنجومەنی وەزیران گەڕایەوە بەغدا.