حکومەتی عێراق: پلان دانراوە بۆ کشانەوەی هێزە بیانییەکان
حەسەن نازم وتەبێژی ئەنجومەنی وەزیرانی عێراق ڕایگەیاند، خشتەیەکی زەمەنی هەیە بۆ کشانەوەی هێزە بیانییەکان لە عێراقدا.
تەلەفزیۆنی عێراقییە لە زاری وتەبێژی حکومەتەوە بڵاویکردەوە، توێژینەوەیەک ئامادە کراوە و خشتەیەکی زەمەنی تیا دیاریکراوە، بۆ کشانەوەی هێزە بیانییەکان لە عێراق.
حەسەن نازم ئاماژەی بەوەشکرد، لە گفتوگۆی عێراق و ئەمریکادا ئەمڕۆ پلانێک بۆ کشانەوەی هێزە بیانییەکان لە عێراقدا دانراوە.
ڕوونیشیکردەوە، تا ئێستا گفتوگۆکان لەگەڵ ئەمریکا بەشێوەیەکی گونجاو بەڕێوەدەچێت.
ئەوەش لەکاتێکدایە ئەمڕۆ وەزارەتی دەرەوەی عێراق ڕایگەیاند، گفتوگۆی ستراتیژی نێوان عێراق و ئەمریکا بە ئامادەبوونی هەردوو وەزیری دەرەوەی عێراق و ئەمریکا دەستی پێکرد.
هەر ئەمڕۆش بەر لە دەستپێکردنی خولی سێهەمی گفتوگۆکانی نێوان ئەمریکا و عێراقیش، ژمارەیەک گروپی چەکداری سەر بە هێزەکانی حەشدی شەعبی، هەرەشەی هێرش و کردەوەی سەربازییان لە هێزەکانی ئەمریکا کرد لە عێراقدا، ئەگەر بەغدا و واشنتۆن وادەیەک دیاری نەکەن بۆ کشانەوەی هێزە بیانییەکان.
لە بەیاننامەیەکدا بە ناوی دەستەی هەماهەنگی بەرگری عێراقی، کە گروپە چەکدارەکانی کەتیبەکانی حزبوڵای عێراقی و عەسائیبی ئەهلی حەق و کەتیبەکانی سەید شوهەدا و بزوتنەوەی نوجەبای لە خۆگرتووە، ڕایگەیاند، بەرەی بەرگری خۆی دەبێتەوە لەبەرامبەر پابەندبوونێک کە بەوپەڕی هێزەوە لێدانی بەهێز و ورد ئاراستە بکات، ئەگەر بێت و گفتوگۆکان بەشێوەیەکی ئاشکرا و روون وادەیەک بۆ کشانەوەی هێزە بیانییەکان دیاری نەکات، کە ئەو بە هێزی داگیرکەر ناوی بردوون.
|