نرخی نەوت بەردەوامە لە بەرزبوونەوە
بەراورد بە دوێنێ سێشەممە، نرخی ئەمڕۆی نەوت لە بازاڕەکانی جیهان تاڕادەیەک بەرزبوونەوەی بەخۆیەوە بینیوە.
بەپێی داتای بۆرسەکانی جیهان، ئەمڕۆ چوارشەممە ٥ی٥ی٢٠٢١، هەر بەرمیلێک نەوتی خاوی برنت بە ٦٩ دۆلار و ٤٤ سەنت مامەڵەی پێوەدەکرێت.
هاوکات نرخی هەر بەرمیلێک نەوتی خاوی ئەمریکاش بە ٦٦ دۆلار و ٢٥ سەنت دیاریکراوە.
ئەوەش لەکاتێکدایە، لە ئێوارەی دوێنێ سێشەممە ٤ی٥ی٢٠٢١دا، نرخی نەوت بەشێوەیەکی بەرچاو بەرزبوونەوەی بەخۆیەوە بینی و نرخی هەر بەرمیلێک نەوتی خاوی برنت گەیشتە ٦٩ دۆلار و ٤ سەنت و نرخی هەر بەرمیلێک نەوتی خاوی ئەمریکاش بە ٦٥ دۆلار و ١٨ سەنت مامەڵەی پێوەکرا.
شیکەرەوانی دۆخی ئابوری ئاماژە بەوە دەکەن، چاوەڕوان دەکرێت نرخی نەوت لە بازاڕەکانی وزەدا زیاتریش بەرزبێتەوە، بە تایبەت دوای ئەوەی خواست لەسەر سوتەمەنی بۆ ویلایەتە یەکگرتووەکانی ئەمریکا و ئەوروپا زیاتر بووە.
لەو چوارچێوەیەشدا چەند ویلایەتێکی ئەمریکا لە ئامادەکاریدان بۆ کەمکردنەوە و سوککردنی کۆتوبەندەکان، کە بەهۆی پەتای کۆرۆناوە سەپێنراون، یەکێتی ئەوروپاش لە ئامادەکاریدایە بۆ پێشوازیکردن لەو گەشتیارە بیانیانەی کە ڤاکسینیان وەرگرتووە.
بەرزبونەوەی نرخی نەوت کاریگەری گەورەی لەسەر ئابوری عێراق و هەرێمی کوردستان دەبێت بەوپێیەی زۆرینەی داهاتیان پشت بە فرۆشتنی نەوت دەبەستێت.
|