وەزیری پێشمەرگە: لێکتێگەیشتن لەگەڵ وەزارەتی بەرگری عێراق هاتووەتە ئاراوە
شۆڕش ئیسماعیل وەزیری پێشمەرگە ڕایگەیاند، ئەو لێکتێگەیشتنەی لەگەڵ وەزارەتی بەرگری عێراق هاتۆتە ئاراوە، جێی بایەخە و هیواخوازن بگاتە رێککەوتنێکی گشتگیر و کۆنکریتی.
وەزیری پێشمەرگە ئەمڕۆ لە میاین بەسەرکردنەوەی سەنگەرەکانی پێشمەرگە لە هەردوو میحوەری باشیک و خازر- موسڵ، جگە لە پثیشکەشکردنی پیرۆزبایی جەژن، ڕایگەیاند جێگەی دڵخۆشی ئەوان و هەموانە هێزی پێشمەرگە لە تەواوی ناوچەکان سەنگەرەکانیان بە رووی تیرۆریستان بەهێز و توکمەیە.
وەزیری پێشمەرگە لە میانی بەسەرکردنەوە و کۆبوونەوەی لەگەڵ فەرماندەکانی پێشمەرگە لە میحوەرەکان، جەختیکردەوە، لێکتێگەیشتنەی لەگەڵ وەزارەتی بەرگری عێراق، دەبێتە مایەی زامنی پاراستنی ئاسایش و سەقامگیری ناوچەکە و تێکشکانی تەواوەتی تیرۆریستانی لێدەکەوێتەوە.
شۆڕش ئیسماعیل جەختیکردەوە، دۆخی ئێستا وا دەخوازێت هەمووان و هاوکار و هەماهەنگی پێشمەرگە بن، بۆ ئەمەش داوایکرد پاڵپشتی دارایی و لۆجیستی و سەربازی هەمەلایەنەی پێشمەرگە بکرێت.
|