تورکیا بەدەیان جار کوردی فریوداوە و یارییەکی گەورە لەسەر گەلی کورد دەکات

قەرەیلان رایگەیاند، تورکیا دەستکەوتی گەلی کورد بە مەترسییدار بۆ داهاتووی خۆی دەبینێت، بۆیە گوێ بۆ هیچ کەسێک ناگرێت، دەشڵێت: دەبێت باوەڕمان بە یەکێتیی خۆمان هەبێت، دەوڵەتی تورک بەدەیان جار کوردی فریوداوە، یارییەکی گەورە لەسەر گەلی کورد دەکات، دەبێت مرۆڤ ئەم دەوڵەتە بناسێت و مەترسییەکانی ببینن.

موراد قەرەیلان فەرماندەی بڕیارگەی ناوەندی پاراستنی گەل (نەپەگە) لە ڤیدیۆکۆنفڕانسێکدا رایگەیاند، "ئەمڕۆ لە ڕۆژهەڵاتی ناوەڕاست شەڕ هەیە، بەڕێبازێکی نوێ شەڕی جیهانیی سێییەمە، هەموو کەس دەزانێت، دوای ئەو شەڕە ناوچەکە سەرلەنوێ دیزاین دەکرێتەوە، دەوڵەتانی داگیرکەری کوردستان، لە هەڵدان بۆ ئەوەی لە دیزاینی نوێدا کورد شوێنی نەبێت، پەیمانی ١٠٠ساڵیی لۆزان، دوو ساڵی ماوە و لە ٢٠٢٣ حوکمی نامێنێت، دەوڵەتی تورکی داگیرکەر دەڵێت: لە لۆزاندا ئێمە مافمان پێشێلکرا، ئەردۆغان خۆی ئەمەی وت، بۆیە ئامادەکاریی دەکەن، دوای پەیمانی لۆزان، سنووری میساقی میلـلیی لەڕووی سیاسیی و یاسایی و سەربازییەوە بخەنە ڕۆژەڤ".

روونیشیکردەوە، کاتێک دەوڵەتی تورک دەیەوێت لە عەفرین هەتا سیدەکان و خواکورک داگیر بکات و زیاتر بەرەوپێش بچێت، ئامانجی دروستکردنی بناغەی ستراتیژیی میساقی میلـلییە.

وتیشی: "لە بەرامبەر پیلانەکانی دەوڵەتی سەردەست و داگیرکەر، پێویستە ئێمەی کوردیش خاوەن ستراتیژیی هاوبەشی نەتەوەیی بین، ئەگەر نا مەترسیی جدیی لەسەر دەستکەوتەکانمان دروست دەبێت".

فەرماندەی بڕیارگەی ناوەندی پاراستنی گەل، جەختیی لەسەر گرنگیی هەڵوێستی ناوخۆیی کردەوە و پشت بەستن بە هەڵوێستیی دەرەکیی ڕەتکردەوە و وتی: "ئەم هێرشانە بەبێ پشتیوانیی هێزی نێودەوڵەتیی پێکنەهاتوە و بەبێ ڕەزامەندیی ئەمریکا فڕۆکە ناتوانێت بەسەر ئەم خاکەدا بفڕێت".

لە ڤیدیۆکۆنفڕانسەکەدا، قەرەیلان، تیشکی خستە سەر بێدەنگیی حکومەتی هەرێم و رایگەیاند، حکومەتی هەرێم بێدەنگە و هەڵوێستی نادیارە، بێدەنگیی ڕەوایەتیی دەدات بە هێرشەکانی تورکیا و وەک ئەوەیە پشتیوانیی بکات، چونکە ئەو بە چەک تانک و تۆپ هێرش دەکاتە سەر خاکی هەرێمی کوردستان، بەرپرسانی حکومەتی هەرێم باوەڕ بە وتەکانی دەوڵەتی تورک دەکەن، کاتێک دەوڵەتی تورک دەڵێت، کێشەم لەگەڵ کوردنییە، بۆ پەکەکە دێم، وادیارە ئەوان باوەڕ بەو قسانە دەکەن ! ".

ئەوەشی خستەڕوو، دەوڵەتی تورکیا بۆ ساڵێک و دوو ساڵ ناچێتە هیچ شوێنێک، پیلانی ماوە درێژی هەیە، دەیەوێت بمێنێتەوە، تورک ٩٥٠ ساڵە لە ئانادۆڵن، تا ئێستا چ بەڵێنێکیان بە کورد دابێت، جێبەجێیان نەکردوە، نە لە سەردەمی عوسمانیی و نە لە سەردەمی کۆماری تورک، لەکاتی هەر سەرهەڵدانێکدا، بەرەیەکی کورد دەخەنە پاڵ خۆیان و پێکەوە بەرەی سەرهەڵدان تەسفیە دەکەن، بۆیە باوەڕکردن بە وتەکانی دەوڵەتی تورک هەڵەی گەورەیە.

ئاماژەی بەوەشکرد، "حکومەتی هەرێم پشتی خۆیان بە ئەمریکا و یەکێتی ئەوروپا قایم دەکەن، ئەوەش لە شوێنی خۆیدا نییە، دەوڵەتی تورک ساڵی ١٩٩٤ لەبەرچاوی ئەمریکا و ئەوروپا توانی قوبرس داگیر بکات و تا ئێستاش لەوێیە، ئەمریکا گەمارۆی خستەسەر، بەڵام دواتر پەیوەندییەکانیان باش بوو، تورکیا دەستکەوتی گەلی کورد بە مەترسییدار بۆ داهاتووی خۆی دەبینێت، بۆیە گوێ بۆ هیچ کەسێک ناگرێت، دەبێت باوەڕمان بە یەکێتیی خۆمان هەبێت، دەوڵەتی تورک بەدەیان جار کوردی فریو داوە، یارییەکی گەورە لەسەر گەلی کورد دەکات، دەبێت مرۆڤ ئەم دەوڵەتە بناسێت و مەترسییەکانی ببینن".

لە بەشێکی دیکەی وتەکانیدا قەرەیلان زانیاریی وردی لەسەر شەڕی ٢٠ ڕۆژەی نێوان گەریلاکانی پارتی کرێکارانی کوردستان (پەکەکە) و سوپای تورکیا لە ناوچەی ئاڤاشین خستەڕوو و رایگەیاند، "ئەو هێرشانەی تورکیا، ئۆپەراسیۆنێکی ئاسایی نییە، سوپایەکی گەورەی هێناوە و چەتەی سوریاش تیایدا بەشدارن، تەکنیکێکی زۆر بەرفراوان بەکاردێنن، بەردەوام بۆردوومان دەکەن، وەک ئەوەی لەبەرامبەر دەوڵەتێکدا شەڕ بکات، لە شەوی ٢٣ی نیسان هێرشی دەستپێکرد، لە ڕۆژی کۆمەڵکوژیی ئەرمەنیی، وەک ئەوەی چی بەسەر ئەرمەن هینا بەسەر ئێمەشی دێنێت، ئەمە پەیام بوو، بەڵام ئێمەش ئامادەکارییمان کردبوو، دەمانەوێت هێزێکی پرۆفیسیۆناڵ تەکنیکی دووژمن تێکببەین و شکست بە دووژمن بێنین، بەرخۆدانێکی زۆر گرنگ ئەنجام دەدەین".

وتیشی: "لە هەندێک شوێنی دووژمن لە شوێنی ڕۆژی یەکەمیەتی و هیچ پێشڕەویی نەکردوە، لە هەندێک شوین چەند کیلۆمەترێک هاتوەتە پێش، بەس شەڕ بەردەوامە."

موراد قەرەیلان بە نەخشە زانیاریی لەبارەی بەرخۆدانی گەریلا و ناوچەکانی شەڕ و ڕایگەیاند، "لە مەتینا، سوپای داگیرکەر هاتوونەتە گردی زەندۆرا، بەڵام نەیانتوانیوە داگیری بکەن و ٢٠ ڕۆژە شەڕ لەوێ بەردەوامە، شەڕی قورسیش لە ئاڤاشینە، گردی مام ڕەشۆی گرتوە، بەڵام هێشتا سەڕ بەردەوامە".

لە کۆتاییشدا فەرماندەی بڕیارگەی ناوەندی پاراستنی گەل (نەپەگە) جەختیکردەوە لەوەی کە، "بۆ گەریلا ئامانج سەرکەوتن و ئەنجامێکی مەزنە، ئەگەر هاوکاریی بۆ گەریلا هەبێت، داگیرکاریی تورکیا لێرە تێکدەشکێت، هاوکارییش نەبێت، ڕەنگە درێژ بکیشێت، بەڵام ئامانج تێکشکاندنی داگیرکارییە، ئێمە خەباتی ئێوە بەگرنگ دەبنینین و خەباتێکی پیرۆزە، باوەڕمان هەیە ئەنجامی هەبێت".