بەرهەم ساڵح و بەشار ئەسەد پەیوەندییەکی تەلەفونییان ئەنجامدا
سەرۆکایەتی کۆماری عێراق رایگەیاند، سەرۆککۆماری عێراق پەیوەندییەکی تەلەفونی لەگەڵ بەشار ئەسەد سەرۆکی سووریا ئەنجامداوە و تیایدا لەبارەی چەند بابەتێکەوە گفتوگۆیانکردووە لەوانەش، "ئاستەنگ و ئاڵنگارییە هاوبەشەکان، بەتایبەتی شەڕی دژی تیرۆر ".
لەراگەیەنندراوێکدا سەرۆکایەتی کۆماری عیراق باسی لەوەکردووە، بەرهەم ساڵح و بەشار ئەسەد لەپەیوەندییە تەلەفونییەکەیاندا، گفتوگۆیان لەبارەی پەیوەندییە دووقۆڵییەکانی نێوان هەردوو وڵات و بەتایبەتی پرسی شەڕی دژی تیرۆر.
بەگوێرەی راگەیەندراوەکەی سەرۆکایەتی کۆمار، "لە درێژەی پەیوەندییە تەلەفۆنییەکەدا جەختکراوەتەوە لە گرنگی پتەوکردنی پەیوەندییەکانی نێوان هەردوو وڵات و پێویستیی ئەنجامدانی کاری پێکەوەیی بەرامبەر مەترسییە هاوبەشەکان، بەتایبەتی تیرۆر و بنەبڕکردنی پاشماوەکانی تیرۆر کە دەیانەوێت سەقامگیری و ئاسایشی هەردوو وڵات و ناوچەکە بشێوێنن ".
ئەوەشخراوەتەڕوو، هەردوو سەرۆک جەختیانلەوەکردووەتەوە؛ نابێت رێگە بە گروپە تیرۆریستییەکان بدرێت بۆشاییە ئەمنییەکان بقۆزنەوە "بۆ ئەنجامدانی کارە تاوانکارییەکانیان، چونکە هەردوو گەلی عێراق و سووریا بەدەست کردە مەترسیدارەکانی تیرۆرستانەوە گیرۆدەبوون.
|